Ղարաբաղաադրբեջանական սահմանին տեղի ունեցող միջադեպերն ու հարձակումները տագնապալի են, սակայն սա չի նշանակում, թե Հայաստանի և Ադրբեջանի միջև պատերազմ է լինելու: Այսօր տեղի ունեցած մամուլի ասուլիսի ժամանակ այս մասին ասաց Տարածաշրջանային հետազոտությունների կենտրոնի տնօրեն Ռիչարդ Կիրակոսյանը՝ հավելելով, որ դրանք դիտմամբ նախորդեցին ԱՄՆ պետքարտուղար Հիլարի Քլինթոնի այցին:
«Ադրբեջանական դիվերսիաները նպատակ ունեին ցույց տալու Հայաստանի ներսում եղած թուլությունը և ձախողելու Հիլարի Քլինթոնի այցը: Ադրբեջանն ուրախ չէ հակամարտության խաղաղ կարգավորման հեռանկարով և հիմա էլ դիվերսիաներ է ձեռնարկում Հայաստանի հետ սահմանին՝ հույս ունենալով նրան որոշակի գործողությունների դրդել»,- ասաց նա:
Ռիչարդ Կիրակոսյանի խոսքով՝ Ադրբեջանն ուզում է ցույց տալ, որ ավելի է ուժեղանում և իրեն կարող է թույլ տալ նոր զենքեր գնել:
«Նախորդ շաբաթ Իսրայելը հայտարարեց այդ երկրին զինամթերք վաճառելու իրողության մասին: Ադրբեջանական ուժերը նոր ռազմական պլան ունեն և պատրաստվում են պատերազմի՝ 2014 թվականին: Ադրբեջանը կարող է օգտագործել պատերազմի սպառնալիքը՝ ավելի մեծ ձեռքբերումների հասնելու համար, սակայն նա դեռևս պատրաստ չէ պատերազմին: Փաստացի, եթե պատերազմն այսօր սկսվի, այդ երկիրը կպարտվի: Սակայն Ադրբեջանը պատրաստվում է հավանական պատերազմին:
Հայաստանը պատրաստ է պաշտպանել իր սահմանները, չնայած կա մի թերություն՝ կապված ազգային անվտանգության հետ: Ազգային անվտանգության ոլորտում որոշումների կայացման գործընթացը պետք է ավելի պրոֆեսիոնալ մարդկանց կողմից կազմակերպվի, ոչ թե քաղաքական գործիչների: Յուրաքանչյուր հարձակման համար Ադրբեջանը պետք է վճարի, և միջազգային հանրությունը նրան պետք է ստիպի իր արարքների համար գին վճարել»,- նշեց Ռ. Կիրակոսյանը:
Անդրադառնալով ԱՄՆ պետքարտուղար Հիլարի Քլինթոնի հայտարարությանը, թե՝ Փարիզում Հայաստանի ու Ադրբեջանի ԱԳ նախարարներին հակամարտության լուծման նոր մոտեցումներ կառաջարկվեն, փորձագետը նշեց, որ իր կարծիքով՝ ԼՂՀ-ն այդ առաջարկների ձևաչափով կդառնա բանակցությունների լիարժեք կողմ: Լավ կլինի, որ Ադրբեջանի վրա միակողմանի էմբարգո դրվի:
«Մի բան ակնհայտ է՝ Քլինթոնը չէր կարող նոր մոտեցումների մասին հայտարարություն անել՝ առանց համաձայնեցնելու Ռուսաստանի ու Ֆրանսիայի հետ»,- ասաց Ռ. Կիրակոսյանը: