Հայաստանում ԱՄՆ դեսպան Ջոն Հեֆերնը իր տեսաբլոգում անդրադարձել է ԱՄՆ պետքարտուղար Հիլարի Քլինթոնի տարածաշրջան կատարած այցին:
Տեսանյութում ԱՄՆ դեսպան Ջոն Հեֆերնը նշում է. «Սա ԱՄՆ պետքարտուղար Հիլարի Քլինթոնի երկրորդ այցն է Հայաստան: Նախագահ Սարգսյանի և արտգործնախարար Նալբանդյանի հետ հանդիպումներում պետքարտուղարը քննարկեց ներքին և տարածաշրջանային հարցեր: Քլինթոնի այցը հստակ մատնանշում է այն կարևորությունը, որ տրվում է Հայաստանին ու տարածաշրջանին պետքարտուղարի և Նախագահի կողմից:
Պետքարտուղարի այցը մեկ անգամ ևս ի ցույց դրեց, որ իրական գործընկերությունը խարսխվում է ընդհանուր արժեքների վրա: Լեռնային Ղարաբաղի հետ կապված` պետքարտուղարը դատապարտեց հրադադարի խախտման վերջին միջադեպը, որին զոհ են գնացել երեք հայ զինվորներ: Նա խոստացավ Բաքվում խստորեն նշել, որ ուժի կիրառումը չի կարող Լեռնային Ղարաբաղի հակամարտության լուծում ապահովել:
Նա նաև հավաստիացրեց Նախագահին և արտգործնախարարին, որ Միացյալ Նահանգները`որպես Մինսկի խմբի համանախագահ, շարունակում է հավատարիմ մնալ Հելսինկյան ակտի երեք սկզբունքներին, այն է` ուժի կամ ուժի սպառնալիքի չկիրառման, տարածքային ամբողջականության ու ազգերի հավասար իրավունքների ու ինքնորոշման սկզբունքները` որպես ինտեգրված ամբողջություն, որ հիմնարար նշանակություն ունի հակամարտության լուծման համար»։
Դեսպանը նշում է նաև, որ «ԱՄՆ պետքարտուղարը հայ-թուրքական հաշտեցման հետ կապված վերահաստատել է իր կարծիքը, որ արձանագրությունների վավերացման հետ կապված գնդակը Թուրքիայի դաշտում է: Քլինթոնը և Նախագահը քննարկեցին ընտրություններին, առևտրին, ներդրումներին, կառավարմանը վերաբերող հարցեր: Պետքարտուղարը հորդորեց ավելի մեծ բարեփոխումներ անել, որպեսզի Հայաստանը լինի ավելի ժողովրդավար»:
