Թեպետ կառավարությունն այս ընթացքում անթերի չի աշխատել, սակայն կարողացել է նվազագույնի հասցնել տնտեսության կորուստները: Այսօր տեղի ունեցած մամուլի ասուլիսի ժամանակ այս մասին ասաց ՀՀԿ խմբակցության պատգամավոր, ՀՔԴՄ կուսակցության նախագահ Խոսրով Հարությունյանը:
«Կառավարության գործունեությանը գնահատական տալու համար պետք է հիմք ընդունել մի շարք գործոններ, այդ թվում՝ համաշխարհային տնտեսական ճգնաժամը: ՀՀԿ-ին տված 44 տոկոս ձայները վկայում են նաև այն մասին, որ մարդիկ վստահել են կառավարությանը, և կառավարության առաջնային խնդիրն այն է՝ կկարողանա՞ հանրության մոտ վստահություն սերմանել, որ ունակ է լավ աշխատելու»,- ասաց նա:
Անդրադառնալով իր՝ ԱԺ պատգամավոր ընտրվելու փաստին՝ նա նշեց, որ խորհրդարանական աշխատանքը շատ հարազատ է իրեն, և ինքն աշխատելու է հնարավորինս արդյունավետ գործունեություն ծավալել. «Իսկ գնահատականը կտան ընտրողները»:
Նորընտիր պատգամավորը քաղաքական տարբեր ուժերի հետ համագործակցության ոչ մի տարբերակ չբացառեց՝ խորհուրդ տալով իրադարձություններից առաջ չընկնել:
Հարցին՝ ինչպե՞ս կարելի է գոհ լինել կառավարությունից, եթե արտագաղթի տեմպերը շարունակում են մեծանալ, Խոսրով Հարությունյանը նկատեց. «Ինձ համար հասկանալի չեն այն բանաձևումները, թե արտագաղթը ահագնացող չափեր է ընդունում: Ճիշտ է, երկրից նույնիսկ 5000 մարդու հեռանալը լուրջ մարտահրավեր է, որը որակապես նոր քաղաքականության իրականացում է պահանջում, սակայն ներկայում վիճակն այնքան էլ անմխիթար չէ, անշրջելի իրողություն չկա»:
Անդրադառնալով վերջին ժամանակներս ադրբեջանական կողմից դրսևորվող ագրեսիվ վարքին՝ Հարությունյանը նկատեց, որ հայկական կողմի պատասխանը՝ և դիվանագիտական, և ռազմական ոլորտներում, պետք է լինի ադեկվատ:
«Այստեղ երկրորդ կարծիք լինել չի կարող: Միաժամանակ, ամենաէական հարցն այն է՝ ինչ նպատակներ է հետապնդում Ադրբեջանը: Ակնհայտ է, որ նրան չի բավարարում խաղաղ բանակցային գործընթացը, և այդ երկիրը ջանում է փոխել գործընթացը կամ միջազգային հանրությանը շանտաժի ենթարկելու գնով հասնել իր նպատակներին: Ակնհայտ է նաև, որ Ադրբեջանը ձեռնոց է նետում ոչ թե ԼՂՀ-ին կամ Հայաստանին, այլ միջազգային հանրությանը: Իսկ նույն այդ միջազգային հանրությունը շարունակում է սիլի-բիլի անել նրա հետ»:
Ամփոփելով՝ ՀՀԿ-ական պատգամավորն ընդգծեց, որ մայիսի 6-ին կայացած ընտրությունները բոլոր նախորդներից տարբերվեցին աննախադեպ հաջողվածությամբ:
