ԱԺ պաշտպանության, ազգային անվտանգության և ներքին գործերի մշտական հանձնաժողովի նախագահ Հրայր Կարապետյանը լրագրողների հետ հանդիպման ժամանակ տեղեկացրեց, որ իրենց հանձնաժողովը դրական եզրակացություն է տվել Զինված ուժերում և Ոստիկանությունում 2009 թ. նախատեսված կառավարության բարեփոխումների ծրագրի շրջանակներում ԶՈւ կարգապահական կանոնագիրք ստեղծելու վերաբերյալ պաշտպանության նախարարության ներկայացրած նախագծին, որն ընդգրկված է մեծ օրակարգում, սակայն քառօրյայում դեռևս ընդգրկված չէ, քանզի դեռևս նախատեսվում է քննարկումներ կազմակերպել միջազգային փորձագետների հետ:
Կարապետյանը նշեց, որ Զինված ուժերում ստեղծվող ներքին կանոնակարգի համաձայն` բոլոր զորամասերում գործելու է ծառայության անվտանգության հանձնաժողով, որի անդամներ են լինելու զորամասի բարձրաստիճան սպայական անձնակազմը:
Կարապետյանը տեղեկացրեց, որ այդ փոփոխություններում կան նաև հոդվածներ հրամանատարների հրամանների սահմանափակման մասին. ցանկացած հրաման, որը վիրավորում է զինվորի արժանապատվությունը, անօրինական է. «Հիմա նման սահմանափակում չկա, հրամանատարներն ինչ ուզում, անում են, և նրանք, ովքեր բարեխիղճ մարդիկ չեն, գերազանցում են իրենց լիազորությունները, ինչի արդյունքում առաջանում է զինվորների ըմբոստությունը, և այն, ինչ դուք գիտեք»:
Կարապետյանը նաև նշեց, որ Հայաստանում հարկավոր է ունենալ զինվորական օմբուդսմենի ինստիտուտ:
Ոստիկանական համակարգում կատարվող բարեփոխումներին անդրադառնալով՝ Հրայր Կարապետյանը տեղեկացրեց, որ այդ համակարգում աշխատող շատ մարդիկ այլևս ոստիկանական հագուստ և ուսադիրներ չեն կրի, նրանք կլինեն քաղծառայողներ: