«Ամերիկացիները մի լավ խոսք ունեն` սատանան մանրուքների մեջ է»,- այսօր լրագրողների հետ հանդիպման ժամանակ ասաց սփյուռքահայ գործարար Վահան Զանոյանը` խոսելով երկպալատ խորհրդարան ստեղծելու՝ Սփյուռքի նախարարի առաջ քաշած գաղափարի մասին:
«Եթե նայենք այս գաղափարին՝ որպես ընդհանուր գաղափարի, դյուրին է խանդավառվելը: Կամա-ակամա, ուզենք-չուզենք՝ այս հայրենիքը աշխարհի բոլոր հայերի հայրենիքն է` եթե ոչ ֆիզիկական հայրենիքը, ապա մտավոր, զգացական, ներաշխարհային հայրենիքը:
Այնպես որ, այդ կապը ավելի պաշտոնական ձևով` երկրորդ պալատ ստեղծելով ամրագրելը, որպես գաղափար, շատ բարձր մակարդակի գաղափար, հոյակապ գաղափար է»,- նշեց սփյուռքահայ գործարարը` հավելելով, սակայն, որ այստեղ մի շարք մտահոգիչ հանգամանքներ կան:
«Ոչ քաղաքացին, թեկուզ և հայ, երբ որ գա և պառլամենտի մեջ աթոռ ունենա, ի՞նչ հանգամանքով պետք է խառնվի Հայաստանի ներքին գործերին: Երկրորդ` ներկայացուցչությունը ինչպե՞ս պետք է լինի: Եթե այդ ողջ պրոցեսը հանձնվի ներկայումս մեր սփյուռքի կուսակցական կառույցների ձեռքը, չեմ կարծում, թե նոր բան կստեղծվի: Նույն մեր հին, հոգնած, հնցած վեճերն ու կռիվները պետք է բերեն՝ պատճենը դնեն Հայաստանի մեջ»,- նշեց Վ. Զանոյանը:
Սփյուռքահայ մեկ այլ գործարար` Վահագն Հովնանյանն էլ ասաց, որ գաղափարը շատ լավ գաղափար է, և որ այս պահին պետք չէ շատ մանրամասների մեջ մտնել:
«Սփյուռքի մեջ հայությունը կամաց-կամաց մաշվում է, սա նորություն է, որով կկարողանանք հետևել մեր հայությանը, տեղեկացված լինել նրա անցուդարձին: Ես շատ դրական կետեր կտեսնեմ այս քայլի մեջ, չեմ ուզում հիմա խոչընդոտներ դնել, բանավիճել, թե այս կամ այն հարցը ինչպես պետք է լինի: Մտածենք կամաց-կամաց շարժելով, տեսնենք` ինչպես կարելի է աճեցնել այս գաղափարը»,- ասաց Վ. Հովնանյանը: