WBC վարկածով ծանր քաշային կարգում աշխարհի չեմպիոն Վիտալի Կլիչկոն իր մոտակա մենամարտը կանցկացնի ընթացիկ տարվա սեպտեմբերի 1-ին, Կիևի Олимпийский մարզադաշտում: Ուկրաինացի բռնցքամարտիկի հակառակորդը կլինի սիրիական ծագումով գերմանացի Մանուել Չարը:
Ավելի վաղ հայտարարվել էր, որ Կլիչկոյի հակառակորդների թվում են նաև կանադացի Բերմեյն Սթիվերնը, կուբացի Լուիս Օրտիսը, լեհ Մարիուշ Վախը, ամերիկացիներ Սեթ Միթչելը և Ֆրանկլին Լոուրենսը:
Վիտալի Կլիչկոյի կարիերայում սա երկրորդ մենամարտն է, որ բռնցքամարտիկն անցկացնում է Ուկրաինայում: Առաջին անգամ հայրենիքում նա մենամարտել է 1998 թվականին: Հանդիպման առաջին իսկ ռաունդում նա իր մրցակից իտալացի Ֆրանչեսկո Սպինելիին նոկաուտի է ենթարկել:
Նախատեսվում է, որ Չարի հետ մենամարտը Վիտալիի կարիերայում վերջինը կլինի: Այնուհետև նա քաղաքականությամբ զբաղվելու մտադրություն ունի:
40-ամյա Վիտալի Կլիչկոն կարիերայի ընթացքում 46 մենամարտ է անցկացրել, որոնցից 44-ն ավարտվել է ուկրաինացի բռնցքամարտիկի հաղթանակով (40-ը՝ նոկաուտով), և 2 մենամարտում Կլիչկոն պարտություն է կրել: Վերջին անգամ Վիտալին մենամարտել է Դերեկ Չիսորայի հետ: Մրցավարների միաձայն որոշմամբ` նա պաշտպանել է չեմպիոնական գոտին:
