Ինչպե՞ս է գնահատում ՀՀ Մարդու իրավունքների պաշտպան Արմեն Հարությունյանի գործունեությունը Խոսքի ազատության պաշտպանության կոմիտեի նախագահ Աշոտ Մելիքյանը: «Առաջին լրատվական»-ի խնդրանքով անդրադառնալով Մարդու իրավունքների պաշտպանի գործունեությանը` Աշոտ Մելիքյանն ասաց.
«Եթե գնահատելու լինեմ խոսքի ազատության պաշտպանության ոլորտին վերաբերող ՄԻՊ-ի գործունեությունը, ապա նա գործել է ալիքաձև հաջողություններով: Եղել են և՛ հաջող մոտեցումներ ու անսպասելի քայլեր, որոնք ուղղված են եղել խոսքի ազատության պաշտպանությանը, և՛ այնպիսի քայլեր, որոնք հիշեցրել են պետական չինովնիկի գործելակերպ:
Այդ կեցվածքը նա ցուցաբերեց, երբ քննարկվում էր «Հեռուստատեսության և ռադիոյի մասին» օրենքում փոփոխություններ կատարելու նախագիծը: Այդ ժամանակ նրա ցուցաբերած դիրքորոշումն ամենևին էլ չէր համապատասխանում իր պաշտոնին:
Նա պաշտպանում էր պետական մոտեցումները և պետական նախագիծը: Երբ նրան առաջարկվեց ստեղծել աշխատանքային խումբ և ղեկավարել այն, դրանով իսկ ապացուցեց, որ այդ օրենքն իրենից բան չէր ներկայացնում»:
Մեր հարցին, թե որքանով կարող է Մարդու իրավունքների պաշտպանը գործել մի երկրում, որտեղ մարդու իրավունքների խախտումները պետական ինստիտուտների կողմից կրում են համակարգված բնույթ, Աշոտ Մելիքյանն արձագանքեց.
«Իսկապես դա շատ բարդ պաշտոն է: Եվ Մարդու իրավունքների պաշտպանը պետք է կարողանա դրսևորել կամք և սկզբունքայնություն, որպեսզի պաշտպանի մարդու իրավունքներն այն պարագայում, երբ դրանք չափազանց շատ են: Նաև իրավիճակն է մեր երկրում բարդ»:
Աշոտ Մելիքյանը կարծում է, որ քաղաքական էլիտան պետք է կարողանա պաշտպանել մարդու իրավունքները, որպեսզի ՄԻՊ-ը իշխանության կողմից չհանդիպի հավելյալ խոչընդոտների:
«Այն մարդը, որը ստանձնում է Մարդու իրավունքների պաշտպանի պաշտոնը, կարծում եմ` պետք է հասկանա իր առաքելությունը և բավարար կամք ցուցաբերի իր աշխատանքում»,- մեր զրույցի ժամանակ նշեց Աշոտ Մելիքյանը:
