«Առաջին լրատվական»-ի «Օրենքի իշխանություն» հաղորդաշարի հերթական թեման նվիրված է` սեփականության իրավունքին, որին անդրադառնում է «Պետական կարիքների զոհեր» հ/կ նախագահ Սեդրակ Բաղդասարյանը:
Մայրաքաղաքի կենտրոնում կառուցվող բազմաբնակարան շենքերի արդյունքում երևանցիներից շատերը այսօր անտուն մնացին, քանի որ շքեղ էլիտար բնակարաններ կառուցելու համար մեր համաքաղաքացիներից չնչին փոխհատուցմամբ խլեցին կառուցապատման ենթակա տարածքները` որպես հանրային գերակա շահ:
Իսկ ինչ է իրենից ներկայացնում հանրային գերական շահը:
Ըստ ԱԺ պատգամավոր Արմեն Մարտիրոսյանի, հանրային գերական շահը իրենից ենթադրում է այնպիսի գործընթաց, որտեղ սկսվող գործընթացը սպասարկելու է բոլորի շահը, այսինքն` հանրության շահը: Ցավոք սրտի Հայաստանում հանրային գերակա շահը ըստ էության եղավ առանձին անհատների շահը սպասարկելու խնդիր և գործընթացը ինքնին դուրս եկավ իր տրամաբանության շրջանակներից:
Այսօր այն մարդկանցից շատերը, որոնցից չնչին փոխհատուցմամբ խլել էին իրենց բանակարանները մնացել են անօթևան կամ ստացած աննշան գումարով քաղաքի ծայրամասում բնակարաններ են ձեռք բերել և այսօր ունեն ավելի վատ պայմաններ, քան նախկինում:
Մարդկանց վտարեցին իրենց տներից, իսկ նորակառույց շենքերը հիմնականում դատարկ են: Բնակարանների մի մասը ունեն վիրտուալ տերեր, իսկ քաղաքացիների բնակարանային խնդիրները մնացել են չլուծված:
Համաձայն ՀՀ Սահմանադրության 31-րդ հոդվածի. «Յուրաքանչյուր ոք իրավունք ունի իր հայեցողությամբ տիրապետելու, օգտագործելու, տնօրինելու և կտակելու իր սեփականությունը։ Սեփականության իրավունքի իրականացումը չպետք է վնաս պատճառի շրջակա միջավայրին, խախտի այլ անձանց, հանրության և պետության իրավունքներն ու օրինական շահերը:Ոչ ոքի չի կարելի զրկել սեփականությունից, բացառությամբ դատական կարգով՝ օրենքով նախատեսված դեպքերի: Սեփականության օտարումը հասարակության և պետության կարիքների համար կարող է կատարվել միայն բացառիկ՝ գերակա հանրային շահերի դեպքերում, օրենքով սահմանված կարգով, նախնական համարժեք փոխհատուցմամբ: Հողի սեփականության իրավունքից չեն օգտվում օտարերկրյա քաղաքացիները և քաղաքացիություն չունեցող անձինք, բացառությամբ օրենքով նախատեսված դեպքերի: Մտավոր սեփականությունը պաշտպանվում է օրենքով»: