Սիսիանի տարածաշրջանի Մուցք գյուղի խոզերի մոտ հայտնաբերվել է աֆրիկյան ժանտախտ հիվանդությունը: Գյուղապետ Դրաստամատ Նավասարդյանի խոսքով, մոտ 10 օր է, ինչ խոզերի մոտ նկատվել է վարակը: Գյուղացիները, չհասկանալով` ինչ է կատարվում, անմիջապես մորթել են խոզերը: Գյուղում հաշվառված 200 խոզից 7 տնտեսության պատկանող 22 խոզ մորթվել է: Սակայն սննդի անվտանգության եւ անասնաբուժական պետական տեսչության Սյունիքի մարզային կենտրոնի պետ Էդգար Թոխսանցն էլ «Առաջին լրատվականի» հետ հեռախոսազրույցում ասաց, որ գյուղում ընդամենը 5 խոզ է հարկադիր սպանդի ենթարկվել ու փորձանմուշները 2 օր է` ուղարկվել են հետազոտության: «Այսօր արդեն ասացին, որ աֆրիկյան ժանտախտ է: Վաղ անասնաբույժների մի խումբ` ինձ հետ միասին կլինեն ինչպես Մուցքում, այնպես էլ տարածաշրջանի այլ համայնքներում: Կախտահանվեն գոմերը, պատվաստանյութ կսրսկվի»,-ասաց Է. Թոխսանցը: Ի դեպ, հիշեցնենք, որ դեկտեմբեր-հունվար ամսիներին Մուցքում հավերի կեղծ ժանտախտ էր: Գյուղի 2,800 հավերը ոչնչացվել են, ու համայնքը 9 մլն դրամի վնաս է կրել:
