Կապանի «Էկոլոգիական անվտանգության ապահովման եւ ժողովրդավարության զարգացման» հասարակական կազմակերպությունը «Հայջրմուղկոյուղու» դեմ հայցով ներկայացել է Սյունիքի մարզի ընդհանուր իրավասության դատարան։ Ըստ հայցադիմումի` ընկերությունը չի կատարում պայմանագրային պարտավորվածությունները։ Մասնավորապես, չեն հեռացվում կեղտաջրերը, ինչի արդյունքում դրանք թափվում են մարզկենտրոնով հոսող Ողջի գետը։ Սա բնապահպանական խնդիրներ է առաջացնում։
Փետրվարի 2-ին նշանակված դատական նիստը նույնպես հետաձգվեց։ Առաջինը հետաձգվել էր, քանի որ «Հայջրմուղկոյուղու» ներկայացուցիչը միջնորդել էր՝ նշելով, որ «աշխատանքներ են տարվում պահանջներից մեկը` կեղտաջրերը քաղաքի միջով հոսող Ողջի գետը չլցվելու ուղղությամբ», և ժամանակ խնդրեց փաստաթղթերով դա հիմնավորելու համար։
«Հայջրմուղկոյուղու» հարավային մասնաճյուղի «Կապան» տեղամասի պետ Հովհաննես Գևորգյանը, ներկայանալով երեկվա նիստին, հայտարարեց, որ տեղացած ձյան պատճառով իրենց ներկայացուցիչը Սիսիանից չի կարող ներկայանալ։
Դատավոր Վոլոդյա Մանասյանը նիստը հետաձգեց մինչեւ փետրվարի 17-ը։
Ավելացնենք, որ «Էկոլոգիական անվտանգության ապահովման եւ ժողովրդավարության զարգացման» ՀԿ-ն դատական այս հայցը ներկայացրել է Բաց հասարակության ինստիտուտի օժանդակության հիմնադրամի Հայաստանի մասնաճյուղի ֆինանսավորմամբ` «Ռազմավարական դատավարության» ծրագրի շրջանակներում: