Երեքշաբթի օրը մեկնարկած Google Art Project ոչ առևտրային նախագիծը, որն իրականացնում է աշխարհի թանգարանների ցուցանմուշների թվայնացումը, չի ընդգրկում Եգիպտոսի թանգարանները, որի ցուցանմուշները կարող են տուժել ժողովրդական հուզումների ժամանակ, РИА Новости գործակալությանն է հայտնել ընկերության ներկայացուցիչը:
«Մենք արդեն իրականացրել ենք աշխարհի ավելի քան 17 թանգարանների ցուցանմուշների թվայնացում, սակայն եգիպտական թանգարանները դրանց ցանկում չեն հայտնվել»,- հայտնել Google-ի ներկայացուցիչը:
2011թ.-ի հունվարին Եգիպտոսում սկսվեցին բողոքի զանգվածային ակցիաներ, որոնք ուղեկցվում են թալանով և հրկիզումներով: Ժողովրդական հուզումների պատճառով Եգիպտոսը կարող է կորցնել մշակութային հազվագյուտ արժեքներ: Մենք տեղեկացրել էինք, որ Եգիպտոսում վերջին օրերի հուզումների ժամանակ ցուցարարները ներխուժել էին Եգիպտոսի մի շարք թանգարաններ` կողոպտելով և փչացնելով հազվագյուտ ցուցադրանմուշներ:
Կան համաշխարհային արժեքների կորստի նախադեպեր ստեղծված նմանատիպ իրադրություններում: 2003թ.-ին Իրաքի տարածքում սկսված ռազմական գործողությունների ժամանակ թալանվեց Բաղդադի ազգային թանգարանը: Ընդհանուր առմամբ թալանվեց ավելի քան 15 հազար ցուցանմուշ, որոնցից միայն 6 հազարը հնարավոր եղավ վերադարձնել:
Art Project-ում հրապարակված են աշխարհի խոշորագույն 17 թանգարանների դահլիճների համապատկերի նկարահանումը և նրանց առկա ցուցանմուշների թվայնացված պատկերները (թվայնացվածների շարքում են հայտնվել նաև ռուսական թանգարանները` Էրմիտաժն ու Պետական Տրետյակովյան պատկերասրահը):
Հիմա Google Art Project (googleartproject.com) կայքի այցելուներին հասու է 365 թանգարանային դահլիճների վիրտուալ պատկերը: