Թուրքագետ Հակոբ Չաքրյանն, անդրադառնալով Եգիպտոսում տեղի ունեցող իրադարձություններին, նշեց, որ եթե նույնիսկ Մուբարաքը տապալվի, միևնույնն է, բանակը մնալու է որպես վերկուսակցական ուժ և կանգնելու է գործադիր ու օրենսդիր իշխանությունների կողքին:
Նա նշեց, որ Եգիպտոսում շատ ծանր է ժողովրդի սոցիալական վիճակը. մարդիկ աշխատում են օրական երկու դոլարով:
Եգիպտոսը արաբական աշխարհի առանցքային երկրներից է, և Անգլիան, Ֆրանսիան ու Գերմանիան ամեն ինչ անում են, որ այնտեղ հաստատվի խաղաղություն: Թուրքագետի կարծիքով, այն, ինչ տեղի է ունենում Եգիպտոսում, երկար ժամանակ կհանգեցնի անորոշության:
«Միշտ չէ, որ հակաժողովրդավարական կարգերի դեմ պայքարը ավարտվում է ժողովրդավարական արժեքների հաստատմամբ»,- ասաց թուրքագետը: Նա հիշեցրեց, որ Իրաքում էլ հակաժողովրդավարական կարգերի դեմ պայքարից հետո սկսեց քաոս տիրել:
Կանխատեսելով, որ Եգիպտոսում կարող են իշխանության գալ իսլամիստ արմատականները` Հակոբ Չաքրյանը կարծիք հայտնեց, թե չի բացառվում, որ մյուս երկրներում էլ իշխանության գան իսլամիստ արմատականները: Նա նշեց, որ արաբական աշխարհում տեղի ունեցող հեղափոխություններից հետո կպահպանվի անկայունությունը, քանի որ հասարակության կենսամակարդակը ցածր է, կրթության մակարդակը` ոչ բավարար, որպեսզի կարողանան յուրացնել ժողովրդավարական արժեքները և պաշտպանել սեփական իրավունքները:
«Անընդհատ բռնատիրական վարչակարգերի օրոք ապրած ժողովուրդներին վերադաստիարակելն էլ է դժվար»,- ասաց նա: Կարսում հայ և թուրք ժողովուրդների բարեկամությունը խորհրդանշող արձանը հանելը, ըստ թուրքագետի, Կարսի քաղաքապետարանի նախաձեռնությունն է: Նա կարծում է, որ միայն Ցեղասպանության ճանաչումը կվերականգնի հայ և թուրք ժողովուրդների միջև հարաբերությունները և հայ ժողովրդի վստահությունը թուրք ժողովրդի նկատմամբ:
Թուրքագետը նշեց, որ Հայոց Ցեղասպանությունը ժխտելու հարցում թուրք իշխանությունների և հասարակության միջև միշտ հաստատվում է համերաշխություն: Եվ դա, ըստ նրա, պայմանավորված է հանցագործի հոգեբանությամբ:
