ՀՀ կառավարության այսօրվա նիստում վարչապետ Տիգրան Սարգսյանը կրթության և գիտության նախարար Արմեն Աշոտյանից հետաքրքվել է Նուբարաշենի թիվ 18 հատուկ դպրոցի խնդրով։
Հիշեցնենք, որ, ՀՀ կառավարության որոշմամբ, այս դպրոցը միացվել է «Փոքր Մհեր» կրթահամալիրին, ինչին դպրոցի աշխատակազմը դեմ է։
Աշոտյանը տեղեկացրել է, որ վերջին տարիներին այս դպրոցի աշակերտների թվի կտրուկ նվազում է եղել, և դպրոցի տնօրինությունն ապօրինաբար սկսել է դպրոց ընդունել նաև ոչ թիրախային խմբի երեխաներին, որոնք չունեին հակասոցիալական և հակաիրավական վարք: Դպրոցում սովորող 80 երեխայից ընդամենը 9–ն են ունեցել համպատասխան փաստաթղթեր։
Աշոտյանը հիշեցրել է, որ բազմաթիվ իրավապաշտպան հասարակական միջազգային կազմակերպություններ այս դպրոցի մասին, որպես կանոն, վատ բաներ են գրել։ «Կա աշխատանքի որակի խնդիր, կա աշխատանքի կարգապահության խնդիր, կա երեխաների իրավունքների պաշտպանության խնդիր, կա հագուստի, սննդի խնդիր։ Տարիների շարունակ այդ խնդիրները չեն լուծվել այնպես, ինչպես պետք է։ Կառավարությունն այժմ ստանձնել է այդ խնդիրների լուծումը»,– ընդգծել է Աշոտյանը։
«Բա ինչո՞ւ են բողոքում»,– հետաքրքրվել է վարչապետը։
«Մեզ հայտնի է, որ այդ կոլեկտիվում եղել են մարդիկ, ովքեր աշխատանքի չէին գալիս, հավելագրումներ կային հաստիքացուցակում, աշխատանքային ռեժիմը խիստ չէր»,– ասել է նախարարը։
Տիգրան Սարգսյանը նշել է, որ մեղավորին պետք է պատժել։ Ի պատասխան՝ Աշոտյանը տեղեկացրել է, որ դպրոցի տնօրենի պաշտոնակատարին ներկայացված է խիստ նկատողություն աշխատանքային կարգապահության խախտման համար: Արմեն Աշոտյանը նաև նշել է, որ ոչ մի աշխատակից չի կրճատվի, սակայն դպրոցի աշխատակազմը պետք է հարմարվի նոր պայմաններին՝ աշխատելով շաբաթական 40 ժամ։ Աշոտյանի խոսքերով, ով չի համակերպվի նոր պայմաններին, չի աշխատի։
«Դպրոցը նպաստում էր ընտանիքներից երեխաների կտրվելուն, կներեք, ողջ ծնողների պարագայում, երբ երկու ծնողն էլ ողջ էին, բայց սոցիալական պատճառներով չէին կարողանում երեխային պահել, բերում էին, թողնում էին այդ դպրոցում։ Հանրապետությունով մեկ այդ դպրոցը, կներեք արտահայտությանս համար, օջախ էր դարձել»,– ոգևորված ասել է Աշոտյանը։
«Անհասկանալի է դառնում, թե ինչից են բողոքում։ Մենք փող ենք նախատեսել մեծ դժվարությամբ, թեև հարյուրավոր դպրոցներ ունեինք, որոնք վերանորոգման կարիք ունեին։ Մենք առաջնահերթություն ենք համարել այս դպրոցում 125 մլն դրամի ներդրում կատարելը։ «Փոքր Մհեր» համալիրը լավագույնն է համարվում Հայաստանում։ Այսինքն՝ ծնողներ կան, ովքեր ուզում են, որ իրենց երեխաներն այնտեղ սովորեն, բայց մենք հնարավորություն չունենք ընդունելու։
Մենք «Փոքր Մհերի» վրա դրել ենք լրացուցիչ բեռ, որ այս դպրոցը ոտքի կանգնեցնի։ Իրենք կանոնները խախտում են, անօրինականություններ են բացահայտվում, բայց իրենք են բողոքում։ Անհասկանալի իրավիճակ է»,– նշել է վարչապետը և հորդորել Աշոտյանին հրապարակային դարձնել այս գործընթացը, խախտումները հրապարակային ներկայացնել, մեղավորներին պատժել։ «Պետք է ցույց տանք, որ պետությունը լուրջ միջոցառումներ է ստանձնում։ Թե չէ «Փոքր Մհերը» երազում էր էս բեռը ստանձնել»,– բարկացած ասել է վարչապետը։
Աշոտյանն էլ ի պատասխան ասել է, որ խիստ որոշակի շրջանակներ կան, խիստ որոշակի շահեր, և եթե բանը հասնի նրան, որ ինքը ստիպված լինի նաև քաղաքական հայտարարություններ անելու, ապա կանի դա:
