Կիպրոսը կարող է դառնալ եվրոգոտու չորրորդ երկիրը, որը կզգա արտաքին ֆինանսական օգնության կարիք: Այս մասին գրում են The Wall Street Journal-ն ու Financial Times-ը:
Մինչև հունիսի վերջ երկրին անհրաժեշտ կլինի հայթայթել 1.8 մլրդ եվրո երկրում մեծությամբ երկրորդ խոշորագույն Cyprus Popular Bank-ի ռեկապիտալիզացիայի համար: Այս մասին ավելի վաղ հայտարարել էր Կիպրոսի Կենտրոնական բանկի նախագահ Պանիկոս Դեմիտրիադեսը:
Այս իրավիճակում ԵՄ-ին օգնության խնդրանքով դիմելը դառնում է ավելի հավանական: «Որքան ավելի մոտ ենք մենք վերջնաժամկետին, այնքան դա ավելի քիչ անհավանական է դառնում»,- խոստովանել է նա:
Կիպրոսը Հունաստանում տիրող ճգնաժամի հետևանքով բախվել է իր 10-ամյա պարտատոմսերի շահութաբերության աճին`մինչև 14 տոկոս, երկրի բանկային համակարգում տիրող իրավիճակի վատացման և վարկաիշի անկման հետևանքով:
Այսպես՝ Հունաստանի հետ կապված կիպրական բանկերի վարկային պորտֆելը կազմում է 22 մլրդ եվրո:
Cyprus Popular Bank-ը ստիպված է դուրս գրել 2 մլրդ եվրո` հունական պարտատոմսերի վերակազմավորման արդյունքում ու հունիսի 15-ից անցկացնում է կապիտալի մեծացում, որին եթե օգնություն չգա արտասահմանից, ստիպված կլինի հույս դնել միայն պետության վրա:
