Եգիպտոսի կառավարության ղեկավար Ահմադ Շավիքը ներողություն է խնդրել երեկ ցուցարարների վրա իրականացված բախումների համար, որոնք տեղի են ունեցել չորեքշաբթի օրը:
«Սա ճակատագրական սխալ էր, և երբ քննությամբ պարզվի, թե ովքեր են այս ամենի հետևում կանգնած, և ով է թույլատրել, որպեսզի այսպիսի դեպքեր տեղի ունենան, ես խոստանում եմ, որ նրանք պատասխանատվության կենթարկվեն և կպատժվեն իրենց արածների համար», -Al-Hayat հեռուստաալիքին ասել է վարչապետը:
«Ոչ մի ներում չկա խաղաղ ցուցարարների վրա հարձակում գործածներին, և սա է պատճառը, որ ես ներողություն եմ խնդրում»: Նա նաև կոչ է արել ցուցարարների «գնալ տուն և օգնել այս ճգնաժամին վերջ տալուն»:
Միաժամանակ կառավարության մամուլի խոսնակ Մագդի Ռադին հայտնել է Reuters գործակալությանը, որ իրենց կառավարությունն այս ամենի հետ կապ չունի և դերակատարություն չի ունեցել Մուբարաքի աջակիցներին մոբիլիզացնելու գործում:
«Մոբիլիզացում կազմակերպելու բոլոր մեղադրանքները, որոնք ուղղված են կառավարությանը, հեքիաթներ են»,- ասել է Ռադին:
Ինչպես փոխանցում է BBC-ն, Թահրիր հրապարակի մատույցներում գտնվող զինվորականները հայտնել են տեղի լրագրողներին, որ իրենք հրաման ունեն թույլ չտալու նման բախումներ և ձերբակալելու են Թահրիր մտնողներին:
Քիչ առաջ հայտնի է դարձել նաև լրագրողի վրա հարձակման և ձերբակալման հերթական դեպքի մասին: Ինչպես հաղորդում են բելգիական լրատվամիջոցները, Le Soir թերթի լրագրող Սերժ Դյումոն ծեծի է ենթարկվել Կահիրեի կենտրոնում, ապա և` ձերբակալվել: Նրան մեղադրում են ընդդիմության առաջնորդ Մուհամադ Ալ-Բարադեի օգտին լրտեսություն անելու մեջ:
Ակտիվացել է նաև «Մուսուլման եղբայրներ» կազմակերպությունը, որը հայտարարել է, որ պատրաստվում է պահանջել Եգիպտոսի` Իսրայելի հետ խաղաղության պայմանագրի չեղյալ համարումը: Եվ դա անելու են Մուբարաքի հրաժարականից անմիջապես հետո: Պետք է նշել, որ «Մուսուլման եղբայրները» ակտիվացել են միայն բողոքի ակցիաների վերջին շրջանում, իսկ բողոքի ակցիաների կազմակերպիչները հիմնականում ոչ կուսակցականներ են եղել, որոնք այդ ամենը կազմակերպել են ինտերնետում սոցիական կայքերի միջոցով:
Al-Jazeera-ի փոխանցմամբ, «Մուսուլման եղբայրների» նման քայլերի վտանգավորությունն այս փուլում կանխատեսելով` ընդդիմադիր ակտիվիստներից մեկը հայտարարել է, որ այս ցույցերի կազմակերպմանն այդ կազմակերպությունը մասնակցություն չի ունեցել, և միայն ակտիվացել է երեքշաբթի օրը:
Ֆրանսիայի, Մեծ Բրիտանիայի, Գերմանիայի, Իտալիայի և Իսպանիայի ղեկավարաները հանդես են եկել համատեղ հայտարարությամբ, որտեղ կոչ են արել իշխանության փոխանցման գործընթացը սկսել անհապաղ, ինչպես նաև մտահոգություն են հայտնել և դատապարտել են այն բռնությունները, որոնք կարող են բարդացնել առանց այն էլ բարդ ներքաղաքական իրավիճակը Եգիպտոսում: