Օրեր առաջ հաղորդել էինք, որ անցյալ ուրբաթ հայ իրավապահներին հաջողվել էր առգրավել աննախադեպ ծավալի թմրանյութ` էքստազիի 42, 000 հաբ եւ մոտ կես կիլոգրամ մաքուր հերոին: Այս գործով ոստիկանները նախ ձերբակալել էին մի ամերիկահայի` Զոհրաբ անունով, ում միջոցով պարզվել էր, որ ներկրված աննախադեպ չափի թմրանյութի հետեւում կանգնած են բարձրաստիճան հայ պաշտոնյաներ: Կիրակի օրը իրավապահները ձերբակալել, ապա ստորագրությամբ բաց էին թողել Զոհրաբին: Հաջորդ օրը, սակայն, Զոհրաբին ազատության մեջ թողնելու որոշումը փոխվել էր, եւ նա կրկին կալանքի տակ էր հայտնվել: Այնուհետ, մեզ հայտնի դարձավ, որ Զոհրաբը շարունակում է մնալ ազատության մեջ… Մեզ հաջողվեց պարզել, որ այս գործի մեջ ներգրավված են Հայաստանի իշխանական համակարգի ուժային գերատեսչությունների բարձրաստիճան ներկայացուցիչներ, ուստի ոստիկանությունը սպասում է Սերժ Սարգսյանի անմիջական հրահանգին, որպեսզի վերջինս որոշի ոչ միայն Զոհրաբի, այլեւ նրա հովանավորների ճակատագիրը… Հիշեցնենք, որ Հայաստանում էքստազիի մեկ հաբի գինը հասնում է 50 ԱՄՆ դոլարի: