«ԼՂՀ-ի հակամարտությունը, բոլորս էլ հասկանում ենք, որ լրջորեն սահմանափակում է Հայաստանի զարգացման հնարավորությունները և այս աշխարհագրական միջավայրում ինտեգրվելու հնարավորությունը»,- այսօր Եվրոպական ուսումնասիրությունների կենտրոնի և Հայաստանում Եվրոպական միության պատվիրակության հրավերով ԵՊՀ-ում հանդիպման ժամանակ ընդգծեց Հարավային Կովկասում Եվրամիության հատուկ ներկայացուցիչ Ֆիլիպ Լեֆորը: Նա անդրադարձավ իր դերին տարածաշրջանում և ասաց, որ իր աշխատանքն այստեղ պատկերացնում է այսպես. «Չկա անլուծելի հակամարտություն։ Անկախ դժվարություններից, անկախ ձգձգվածությունից, հակամարտության ցավոտ լինելուց՝ միշտ կա ելք, կարող ենք քննարկել մեթոդները: Միշտ էլ կա այլընտրանք, և Հայաստանի պարագայում մենք համոզված ենք, որ այլընտրանքը Մադրիդյան սկզբունքներն են»:
Նա խորհուրդ տվեց Հայաստանին շատ չհենվել միջազգային գործընկերների վրա և ասաց, որ այդպիսի կազմակերպությունները ամենազոր և ամենակարող չեն՝ լինեն դրանք դաշնակիցներ, գործընկերներ, չեն կարող փոխարինել կողմերի կամքին՝ լուծելու հակամարտությունը. «Տուժած երկրներն ասում են՝ դրսից կգա օգնությունը, սակայն դուրսը նախ և առաջ իր շահերին է նայում, լուծումը պետք է ներսից գտնվի»: Իսկ ներսից այդ լուծումները գտնելու գործում, ըստ Ֆիլիպ Լեֆորի, պատասխանատվություն են կրում քաղաքական առաջնորդները, քանի որ աշխարհի պատմության մեջ չի եղել, որ հակամարտության լուծումները ներքևից վերև գնան, միշտ կառավարությունները պիտի լուծում գտնեն, որ երկրում էլ դա լինի. «Անհրաժեշտություն են նաև դիվանագիտական հարաբերությունները, ինչպես նաև՝ ժողովուրդների միջև շփումները»: