«ԵՄ-ն համեմատաբար նոր դերակատար է տարածաշրջանում, սակայն միայն քաղաքականության մեջ է նոր, որովհետև անկախությունից հետո ԵՄ-ն միշտ եղել է այստեղ՝ որպես մարդասիրական, համագործակից դերակատար»,- այսօր Եվրոպական ուսումնասիրությունների կենտրոնի և Հայաստանում Եվրոպական միության պատվիրակության հրավերով ԵՊՀ-ում հանդիպման ժամանակ ասաց Հարավային Կովկասում Եվրամիության հատուկ ներկայացուցիչ Ֆիլիպ Լեֆորը:
Նա խոսեց տարածաշրջանում ԵՄ-ի դերի մասին, անդրադարձավ ԼՂՀ-ի հակամարտությանը, նշեց, որ տարբեր պետություններ ունեն տարբեր տեսակետեր, կարծիքներ, թե ԵՄ-ն ինչ դերակատար պիտի լինի տարածաշրջանում. «Մենք ունենք որոշակի սցենար, որի հիմքում Մադրիդյան սկզբունքներն են: Սա միակ ձևաչափն է, որին մինչ օրս երկու պետություններն էլ համաձայնել են, եթե ձևաչափը փոխենք, շատ մեծ ռիսկ կա, որ զրոյական կետի կվերադառնանք»: Ըստ այդ ձևաչափի՝ կողմերին և Մինսկի խմբին պետք է տրամադրել բոլոր ռեսուրսները, որոնք որ անհրաժեշտ են հարթելու համար տարածաշրջանային խնդիրները, տարածաշրջանը պետք է վերակառուցել, նորից կապել արտաքին աշխարհի և ԵՄ-ի հետ.
«Մեզ անհրաժեշտ է աշխատող հարավկովկասյան միջանցք, ԵՄ-ն այսօր սահմանակից է Սև ծովին, մենք ուզում ենք, որ հաղորդակցություն ունենանք, և երկու մայրցամաքներն ունենան հաղորդակցություն՝ մարդկանց և էներգակիրների համար: Մենք բացառում ենք պատերազմը տարածաշրջանում»: Նա նշեց, որ պատերազմը կարող է աղետալի լինել ոչ միայն երկու պետությունների՝ Հայաստանի և Ադրբեջանի, այլև՝ Վրաստանի, Թուրքիայի, Ռուսաստանի համար:
Անդրադառնալով Հարավային Կովկասում ԵՄ-ի դերին, ներկայացուցիչն ասաց, որ իրենք պիտի որոշակի ուժ ունենան այստեղ, որովհետև տարածաշրջանի երկրները, չգիտես ինչու, իրավիճակը ընկալում են մրցակցային. «Մենք այդ խաղը չենք խաղում, ԵՄ-ն հակահեգեմոնիկ կառույց է: Տարածաշրջանում առկա են վաղուց չլուծված հակամարտություններ, և Հարավային Կովկասում հարցի ներկայացումն ու հակամարտության լուծումները գոհացուցիչ չեն: Դրա համար ԵՄ-ն հաստատել է իր դիրքորոշումը՝ ներգրավված է լինելու Հարավային Կովկասի հակամարտության լուծման գործում»:
