«Հզոր Թուրքիա» կուսակցության առաջնորդն ու կուսակցության անդամները պատրաստվում են հոկտեմբերի 28-ին այցելել Հայաստան, այս մասին, թուրքական Beyazgazete կայքի փոխանցմամբ, հայտարարել է «Հզոր Թուրքիայի» առաջնորդ Թունա Բեքլեւիչը: «Հայ և թուրք երիտասարդներն այլեւս սահմանների հետեւում չեն թաքնվում: Համարձակորեն դուրս են գալիս ասպարեզ եւ բացականչում, որ սահմանը պետք է բացվի: 31 կետից բաղկացած գործողության պլան ենք մշակել: Հոկտեմբերի 28-ին իմ թիմի հետ անձամբ ես մեկնելու եմ Երեւան»,- հայտարարել է թուրք քաղաքական գործիչը` տեղեկացնելով իրենց այցելության ծրագրերի մասին։ «Երեւանում կազմակերպելու ենք մամուլի ասուլիս եւ մեր առաջարկները ներկայացնելու ենք հայ հանրությանը: Հանդիպում ենք խնդրելու Հայաստանի ԱԳ նախարար Էդվարդ Նալբանդյանից եւ խնդրելու ենք նրան արձագանքել մեր առաջարկներին: Այնուհետև Թուրքիայի ԱԳ նախարար Ահմեդ Դավութօղլուին ենք ներկայացնելու հայ հանրության տեսակետները: Հանդիպելու ենք նաեւ Թուրքիայի նախագահի եւ վարչապետի հետ: Մի խոսքով` դուռ չի մնալու, որ չթակենք»,– ասել է նա: Նշելով, որ իրենց գործողության ծրագիրը կազմվել է հայաստանյան 40 Հ/Կ-ների հետ բանակցություններից եւ Ստամբուլում տեղի ունեցած համաժողովից հետո, Բեքլեւիչը հայտարարել է, թե «Ցյուրիխ–2»–ի մեկնարկը տրված է։ «Հասարակական դիվանագիտության նախաձեռնությունը զարկ տվեց «Ցյուրիխ–2»–ի մեկնարկին: Այդ գործընթացն սկսած բարեկամության խումբն օրեցօր հզորանում է: Մեկ շաբաթվա ընթացքում մեր թիվը հասել է հազարի: Մեր խմբին անդամակցող հայերն ու թուրքերը շատ վճռական են: Ամենակարճ ժամանակահատվածում սահմանի բացման ուղղությամբ տարվող մեր աշխատանքներն արդյունք են տալու»,- ասել է թուրք գործիչը։