«Առաջին լրատվականը» արդեն տեղեկացրել է, որ Ռուսաստանի ֆուտբոլի միության առաջին փոխնախագահ Նիկիտա Սիմոնյանը Infox.ru-ի թղթակցի հետ հեռախոսազրույցի ժամանակ ասել էր, որ ռուս-հայկական առաջիկա ֆուտբոլային հանդիպման վերաբերյալ տեղեկատվությունն անհեթեթություն է: Այսօր ռուսական լրատվամիջոցներում այս թեման նոր զարգացումներ է ունեցել:
«Московский Комсомолец» հեղանակավոր պարբերականում լույս տեսած «Зачем нам покупать победу?» («Մեր ինչի՞ն է պետք գնել հաղթանակը») վերնագրով հոդվածը սկսվում է հետևյալ տողերով. «Ռուսաստանի հավաքականն ի վիճակի է հաղթել միայն փողով: Համենայնդեպս Հայաստանում այդպես են կարծում: Ինչպես հաղորդում է հայկական պարբերականներից մեկը («Ժամանակ» օրաթերթը, խմբ.), Ռուսաստանը Հայաստանի իշխանություններին գործարք է առաջարկել, որի դիմաց Հայաստանի հավաքականից պահանջվում է զիջել խաղը ՌԴ հավաքականին:»
Այնուհետև մեջ է բերվում Նիկիտա Սիմոնյանի Infox.ru-ին տված հարցազրույցը, որից հետո ներկայացվում է Սովետական Միության վաստակավոր մարզիչ Անատոլի Բիշովեցի «МК»-ն տված հարցազրույցը.
«Նման պրակտիկա իսկապես գոյություն ունի և ըստ ամենայնի ծուխն առանց կրակի երբեք չի լինում: Նման խոսակցություններ եղել են նաև 1999 թ. նույն Հայաստանի հավաքականի հետ խաղից առաջ, 2005 թ. Լատվիայի հավաքականի հետ խաղից առաջ և 2007 թ. Իսրաելի հետ խաղից առաջ: Այս ամենն ընդամենը ֆուտբոլի շուրջ պտտվող խոսակցություններ են, որոնք իհարկե ոչ մի պաշտոնական ստատուս չունեն: Իսկ նման քննարկումների պատճառն այն է, որ Հայաստանի հավաքականը խմբում առաջին տեղը բարձարանալու իրական հնարավորություն ունի: Հավաքականներին իրարից երկու միավոր է բաժանում, իսկ հանդիպումը պետք է կայանա Երևանում: Բացի դրանից այժմ Հայաստանի հավաքականը բավական մրցունակ թիմ է: Բայց ես կարծում եմ, որ մեր հավաքականի վարպետությունն ու փորձը բավարար են մրցակցին առանց կողմնակի օգնության հաղթելու համար»:
«Эхо Москвы»-ն նույնպես անդրադարձել է այս հարցին: Ռադիոկայանը, հղում կատարելով «Ժամանակ» օրաթերթին, հաղորդում է թերթում տպագրվածի մասին: Նշվում է նաև, որ 2008թ. Իսրայելի հետ հանդիպումից առաջ գրեթե բոլորը խոսում էին նմանատիպ գործարքի մասին, բայց արդյունքում Հինդինգի թիմը չհաղթեց: