ՀՀԿ փոխնախագահ Գալուստ Սահակյանը նորընտիր ԱԺ առաջին նիստի ժամանակ առաջարկեց ԱԺ հաշվիչ հանձնաժողովը ձևավորելու համար ներառել ՀՀԿ-ական երկու, մնացած կուսակցություններից մեկական պատգամավորների: Նրա առաջարկը 95 կողմ ձայներով ընդունվեց:
Օրակարգի երկրորդ՝ ԱԺ նախագահ ընտրելու հարցով ՀՀԿ փոխնախագահ Գալուստ Սահակյանը առաջադրեց Հովիկ Աբրահամյանի թեկնածությունը:
Հիմնական զեկույցի ժամանակ Հովիկ Աբրահամյանը նշեց, որ երախտապարտ է ՀՀ նախագահին՝ նման վստահության համար:
«ՀՀ 5-րդ գումարման խորհրդարանում ներկայացված է գրեթե ողջ քաղաքական դաշտն՝ իր ներկապնակով: Վստահ եմ, որ այս ԱԺ-ն դառնալու է քաղաքական միջավայրի հասունության մարմին, պառլամենտարիզմի օրրան: Մենք պատրաստ ենք ճիշտ ուղղությամբ տանել մեր երկրի զարգացումը: Համոզված եմ, որ եկել է աշխատելու ժամանակը, ու պիտի աշխատենք բոլորս միասին: Մեր երկրի առջև ծառացած խնդիրները պետք է միասնաբար լուծենք:
Իմ ծրագրային մոտեցումները չեն փոխվել: Ես առավել քան վստահ եմ ուժեղ խորհրդարանի իմ մոտեցումներում, որտեղ առաջնային նշանակություն ունեն հանդուրժողականություն ու գործընկերությունը: Հինգ տարի մենք աշխատելու ենք միասին, այս խորհրդարանը լավ խորհրդարան է լինելու: Ես դրա համար եռանդ չեմ խնայելու: Ամեն ինչ անելու եմ, որ նրա աշխատանքային մթնոլորտի վրա ոչ մի բան չազդի:
ԱԺ-կառավարություն հարաբերությունները տեսնում եմ դինամիկ զարգացման մեջ: Չեմ վարանելու լինել կառավարության քննադատը, միաժամանակ լինելու եմ նրա առաջին պաշտպանը: Ես պատրաստ եմ իմ համոզմունքերով վարակել բոլորին»,- ասաց նա: