Այսօր առավոտան ԱԺ պատգամավորները ծաղիկներ են դրել ԱԺ բակում հոկտեմբերի 27 –ի զոհերի հիշատակը հավերժացնող հուշակոթողին։ Ի դեպ, պատգամավորներից բացի` ԱԺ-ում էին Կարեն Դեմիրճյանի այրին՝ տիկին Ռիման, Վազգեն Սարգսյանի մայրը՝ տիկին Գրետան եւ եղբայրը՝ Արմեն Սարգսյանը։
Իր սովորական ժամին խորհրդարանը սկսեց աշխատանքները. նախ բոլորը մեկ րոպե լռությամբ հարգեցին հոկտեմբերի 27-ի ոճրագործության զոհերի հիշատակը։ «Այսօր լրանում է 1999թ. հոկտեմբերյան քստմնելի ոճրագործության 11-րդ տարեդարձը, ոճրագործություն, որ առաջին հերթին ոտնձգություն էր ոչ միայն պետական քաղաքական ականավոր գործիչների կյանքի նկատմամբ, այլև հարված` պետականության ողնաշարին: Ողբերգական իրադարձությունների հետևանքով կորցրեցինք պետության ու ժողովրդի նվիրյալ զավակների, ովքեր իրենց ապրած կյանքով ու գործունեությամբ ազնվորեն ծառայեցին հասարակությանը, ովքեր ունեին բազում ծրագրեր և դրանք իրականացնելու հաստատակամություն»,- նիստի սկզբում հայտարարեց Հովիկ Աբրահամյանը:
