Ամերիկայի Միացյալ Նահանգների «Կազմակերպությունների ազգային էթնիկական կոալիցիայի» (ԿԱԷԿ- NECO) նախագահ Նասեր Կազեմին այսօր հյուրընկալվել է Խաչատուր Աբովյանի անվան հայկական պետական մանկավարժական համալսարանում: Նասեր Կազեմին Հայաստանում է ՀՀ նախագահ Սերժ Սարգսյանի հրավերով:
Մանկավարժական համալսարանի ռեկտոր, պատմական գիտությունների դոկտոր, պրոֆեսոր Ռուբեն Միրզախանյանը Նասեր Կազեմիին շնորհել է պատվավոր դոկտորի կոչում և համալսարանի բարձրագույն պարգևը` հայ մեծ լուսավորիչ «Խաչատուր Աբովյան» ոսկե մեդալը, որը հանդիսանում է ՀՀ գերատեսչական հնագույն պարգևը: Այնուհետև ռեկտորը ողջունելով ներկաներին, խոսել է ամերիկյան երազ արտահայտության մասին նշելով. «Այս հասկացությունը մեկնաբանում ենք տարբեր ձևերով, բայց այսօր այստեղ է այն անձնավորությունը, ում համար այդ հասկացությունը խորհրդանշական բնույթ չի կրում: Ձեր կյանքն ու գործունեությունը վկայությունն է այն ամենի, թե ինչպես կարելի է կյանքում` շնորհիվ տաղանդի և մեծագույն աշխատասիրության, հասնել բացառիկ հաջողությունների»:
Ռեկտորը հակիրճ խոսեց նաև Կազեմիի գործարար աշխարհում ունեցած հաջողությունների մասին, նշելով, որ նրա շնորհիվ 200 000 մարդ ստացել է աշխատանք և գտել իր տեղը կյանքում: Ընդգծեց նաև նրա մեծ ավանդը հասարակական, բարեգործական աշխատանքներում:
Որպես օրինակ բերելով Կազեմիի հաջողությունները` ռեկտորն ասել է. «Յուրաքանչյուր երիտասարդ պետք է հավատա իր ուժերին, շնորհիվ իր կրթության և աշխատասիրության նա կարող է հասնել իրական հաջողությունների»: Այնուհետև Նասեր Կազեմին շնորհակալություն է հայտնել ռեկտորին, նշելով, որ իր համար մեծ պատիվ է ընդունել նման պարգևը: Կազեմին ներկաների հետ կիսվել է Հայաստանից ստացած իր հոյակապ և աննկարագրելի տպավորություններով:
«Մենք հիրավի տաղանդավոր հայեր ունենք Միացյալ նահանգներում: Հայեր, որոնք նպաստել են, որ ԱՄՆ-ի զարգացման բնույթը փոխվի: Նրանց հետ հանդիպելուց միշտ մեծ հաճույք եմ ստացել: Դուք իսկապես շատ տաղանդավոր, մեծ շնորհքի տեր ժողովուրդ եք: Ինձ համար այսօր հաճելի և օգտակար է հանդիպել ձեզ հետ»,- ասել է Նասեր Կազեմին: Կարևորելով կրթության դերը` նա ընդգծեց. «Կրթության կարող է մրցունակություն բերել աշխատաշուկայում, իսկ մրցունակ լինելու համար անհրաժեշտ է ունենալ լավ կրթություն: Այն կարևոր է ցանկացած ոլորտում և Հայաստանն այն երկրներից է, որ վերջին տարիներին կարողացել է լայնամասշտաբ գործունեություն իրականացրել` իր տեղը բարձրացնելով ոչ միայն տարածաշրջանում, այլև՝ ամբողջ աշխարհում: Այժմ դուք հիմքեր եք դնում ապագա Հայաստանի համար: Ձեր աշխատանքը մեծ նպատ կբերի ձեր, ձեր երեխաների և հետագա սերունդների համար»,- ընդգծեց Նասեր Կազեմին: Վերջում նա նշել է, որ ինքն իրականացրել է ամերիկյան երազանքը, և համոզված է, որ հայերը նույնպես կարող են իրականացնել իրենց՝ հայկական երազանքը, բայց այն իրականացնելուց առաջ նախ պետք է հասկանալ, թե ինչի կարիք ունի իրենց հայրենիքն ու համայնքը:
«Ամենակարևորը՝ աշխատանքի ցանկությունն է և ճիշտ քայլեր անելը: Ձեր երազանքն իրականցնելուց առաջ նայեք և հասկացեք, թե ինչի կարիք ունի ձեր հայրենիքը»,-ներկաներին խորհուրդ է տվել Կազեմին: Միջոցառումն ավարտվել է մանկավարժական համալսարանի պարային համույթի ելույթով, որը ներկայացրեց ժողովրդական և ազգագրական պարերի շարք:
