Ժողովրդական կուսակցության նախագահ Տիգրան Կարապետյանը կարծում է, որ «Ժառանգություն կուսակցությունն ուզում է օրիգինալ երեւալ քաղաքական դաշտում, այդ պատճառով է պահանջում Ազգային ժողովից ճանաչել Լեռնային Ղարաբաղի անկախությունը: Նա հիշեցրեց, որ Րաֆֆի Հովհաննիսյանը եղել է ՀՀ առաջին արտգործնախարարը: Տիգրան Կարապետյանը կարծում է, որ ՀՀ արտգործնախարարությունը մինչ այսօր գտնվում է արտաքին ուժերի ազդեցության տակ: «Եթե մեր ԱԳ նախարարը հայտարարում է, որ Իրանի պատժամիջոցների հետ կապված` պետք է հարգենք ՄԱԿ-ի Անվտանգության խորհրդի որոշումը եւ այն ընդունենք, եւ դա նա ասում է այն ժամանակ, երբ մեր վարչապետը այց է կատարել Իրան, ինչի մասին է խոսքը»,- ասում է Տիգրան Կարապետյանը: ԺԿ նախագահը կողմ է «Ժառանգության» գաղափարին եւ շատ կցանկանար, որ Արցախը լիներ մեր մարզերից մեկը: «Բայց այսօր այդ հարցը առաջ քաշելը նշանակում է խախտել այն status-quo-ն, որը մենք ձգտում ենք պահպանել, որպեսզի պատերազմ չլինի»,- ասաց նա: Միաժամանակ նա «Ժառանգության» քայլը գնահատում է որպես նախընտրական PR` ՀՀ Նախագահի ապագա ընտրությունների համար: