Թուրքիայի քաղաքականությունը չեզոքացնում է Գյուլի հայտարարությունը: Այսօր «Առաջին լրատվական»-ի հետ զրույցում այս մասին ասաց թուրքագետ Լևոն Հովսեփյանը` անդրադառնալով Թուրքիայի նախագահ Աբդուլլահ Գյուլի օրերս արած հայտարարությանը, թե հայ-թուրքական հարաբերությունները սառեցված չեն:
Ըստ նրա` Գյուլի վերջին հայտարարությունը հայտարարություն է, որն իրական քաղաքականությունից հեռու է, և ակնհայտ է, որ Թուրքիայի իշխանությունները չունեն քաղաքական կամք, այսինքն` Թուրքիան իր քաղաքականությամբ դա պարզապես ցույց է տվել: «Գյուլը նման հայտարարություն է անում և ինչ–որ տպավորություն է ստեղծում, թե որոշակի գործընթաց կա այդուհանդերձ, սակայն էլի եմ կրկնում՝ Թուրքիայի կեցվածքը, Թուրքիայի քաղաքականությունը և Թուրքիայում քաղաքական կամքի բացակայությունը չեզոքացնում են Գյուլի այդ հայտարարությունը»,- մեկնաբանեց Լևոն Հովսեփյանը: Նա նաև չբացառեց, որ սա ինչ–որ մասով նաև կապ ունի Հիլարի Քլինթոնի՝ Հայաստան կատարելիք այցի հետ, քանի որ Թուրքիան սրանով ուղղակի ինչ–որ մեսիջ է փորձում հաղորդել, սակայն նման հայտարարությունն ու նման պահվածքը հերթական շղարշն է: