Փետրվարի 2-ը տխուր օր էր Հայաստանում: Մենք հրաժեշտ տվեցինք Մարդու իրավունքների պաշտպան Արմեն Հարությունյանին: Բայց փետրվարի 2-ը Հայաստանում նաև ուրախ օր է, քանի որ մենք այդ օրը հրաժեշտ տվեցինք Ռոբերտ Քոչարյանի ամենավատ կադրին` Մարդու իրավունքների պաշտպան Արմեն Հարությունյանին: Իսկ գիտենալով, թե ինչ կադր է Քոչարյանն ինքը, կարելի է պատկերացնել, թե ինչ է նշանակում նրա ամենավատ կադր լինելը: Հետևաբար, այդ կադրին հրաժեշտ տալն ուրախալի երևույթ է:
Արմեն Հարությունյանը գնում է Կենտրոնական Ասիա, որտեղ լինելու է ՄԱԿ-ի մարդու իրավունքներով հանձնակատարի հատուկ ներկայացուցիչը այդ տարածաշրջանում: Իսկ ընդհանրապես, փետրվարի 2-ը Հայաստանում շատ սովորական մի օր է, քանի որ Հայաստանից հեռանում է շատ սովորական մի քաղաքացի, որը Հայաստանի ներիշխանական համակարգի համար շատ սովորական մեթոդներով բազմեց օմբուդսմենի աթոռին և հիմա էլ շատ սովորական ձևով առաջնորդվում է «որտեղ հաց, այնտեղ կաց» համահայկական սկզբունքով ու հեռանում Հայաստանից՝ գլուխն ազատելով ավելորդ գլխացավանքներից:
Իսկ հեռանալուց առաջ էլ չի մոռանում իր հաջորդին լավություն անել և զգուշացնում է, որ պետք է պատրաստ լինել մամուլի միջոցով քաղաքական շանտաժի ենթարկվելուն: Երևի թե արժեր, որ մեկն էլ խորհուրդ տար Արմեն Հարությունյանին, թե պետք է պատրաստ լինել գոնե արժանապատիվ հեռանալուն: Նա ակնհայտորեն պատրաստ չեղավ մինչև վերջ արժանապատիվ օմբուդսմեն մնալ և, լինելով Քոչարյանի ամենավատ կադրը, շատ արագ ժամանակում կարողացավ դառնալ Սերժ Սարգսյանի լավագույն կադրերից մեկը:
Առաջնորդվելով այն սկզբունքով, որ իր աշխատանքի լավագույն գնահատականը կլինի թե՛ իշխանության, թե՛ ընդդիմության դժգոհությունը, Արմեն Հարությունյանն ընդամենը ինքն էլ զզվեց իր աշխատանքից և առաջին իսկ հարմար առիթը օգտագործեց դրանից ազատվելու համար: Եվ իսկապես, թե՛ նալին, թե՛ մեխին խփող իրավապաշտպանի գործը ոչ միայն շրջապատի, այլ նաև հենց իր համար է ըստ էության անտանելի և ատելի:
Այնպես որ, Արմեն Հարությունյանի դեպքում մենք տեսնում են սովորական մարդկային հոգեբանության սովորական կատակլիզմների դրսևորում: Եվ լավ է, որ Հայաստանի օմբուդսմենի պաշտոնը ձերբազատվում է այդ կատակլիզմներից: Միայն թե հույսը քիչ է, որ ձերբազատվում է մեկընդմիշտ, քանի որ նոր օմբուդսմենին նշանակողը կրկին լինելու է այն նույն իշխանությունը, որը նշանակել էր Արմեն Հարությունյանին:
