Սոչիում վերջին օրերին հայերի և չեչենների ու դաղստանցիների միջև լարված մթնոլորտը լուրջ հիմքեր չունի և կապված է քաղաքում Օլիմպիադայի անցկացման նախաշեմին շինարարական աշխատանքների, կենցաղային հողի վրա ծագած վիճաբանությունների հետ: Այսօր կայացած մամուլի ասուլիսի ժամանակ այս մասին ասաց ԱՊՀ երկրների ինստիտուտի տնօրեն Կոնստանտին Զատուլինը:
Անդրադառնալով ԼՂ հակամարտությանը՝ նա նկատեց, որ առնվազն հիմարություն է, երբ Ադրբեջանը Լեռնային Ղարաբաղ այցելած օտարերկրացիներին անցանկալի անձ է հայտարարում:
«Ես տեղեկացա, որ այսօր ԼՂՀ է ժամանում Քարոլինա Քոքսը՝ արդեն որերորդ անգամ: Ի՞նչ է, նրան այդքան անգամ պետք է պերսոնա նոն գրադա՞ հայտարարել»,- հարց հնչեցրեց Զատուլինը:
Ռուսաստանցի գործիչը, խոսելով ԼՂՀ-ում անցկացված վերջին ռազմական շքերթի մասին, նկատեց, որ Ադրբեջանը բարոյական իրավունք կունենար գնահատականներ հնչեցնելու, եթե այդ երկրում Հայաստանի հասցեին հնչող ռազմատենչ հայտարարությունները պակասեին, կրճատվեին ռազմական բյուջեի ծավալները, որոնք ՀՀ ամբողջ բյուջեի չափ են:
«Կարծում եմ՝ հակամարտող կողմերը պետք է փոխզիջումների գնան: Իմ կարծիքով՝ անհնար է, որ ԼՂՀ-ն Ադրբեջանի մաս կազմի, որքան էլ հայտնած այս մտքի համար Ադրբեջանում նեղանան ինձնից: Ակնհայտ է, որ հայ ժողովուրդը կանգնած է Լեռնային Ղարաբաղի համար, հայկական կողմը երբեք չի զիջի ԼՂՀ-ն: Իսկ մինչ այդ պետք է պահպանել հրադադարի ռեժիմը»,- ասաց նա:
Խոսելով Ադրբեջանում տեղակայված Գաբալայի ռադիոտեղորոշիչ կայանի մասին՝ Զատուլինը նկատեց, որ ոչինչ չի կարող ասել Հայաստանում նմանօրինակ մեկ այլ կայանի հնարավոր տեղակայման մասին: