Այսօր կայացավ ԱՊՀ երկրների ինստիտուտի կողմից հրատարակված, մի քանի գլուխներից բաղկացած «Բաց Ռուսաստան. Նոր կերպար տեղեկատվության դարում» գրքի շնորհանդեսը, որտեղ անդրադարձ է կատարված հայաստանյան լրատվամիջոցների կողմից ռուսաստանյան իրականության լուսաբանմանը: Լրագրողների հետ հանդիպմանը այդ գրքին անդրադարձավ քաղաքագետ Ալեքսանդր Մարկարովը:
«Հայաստանյան լրատվամիջոցներում հայ-ռուսական հարաբերությունների լուսաբանմանը նվիրված նյութերի մեծ մասը դրական լույսի ներքո են, չնայած կան նաև չեզոք ու բացասական շեշտադրումներով նյութեր»,- ասաց նա:
Ասուլիսի մյուս բանախոս՝ ԱՊՀ երկրների ինստիտուտի տնօրեն Կոնստանտին Զատուլինն իր հերթին նկատեց, որ ուրախ է կրկին գտնվել Հայաստանում: «Հայաստանը նոր-նոր է անցել ընտրական շրջանը: Ռուսաստանում ևս ոչ վաղ անցյալում տեղի ունեցան Պետդումայի և նախագահի ընտրություններ: Իհարկե, շատ կարևոր է, որ այս գործընթացների մեջ չմոռանանք միմյանց մասին:
Կարծում եմ՝ սեպտեմբերի 7-ին կկայանա ՌԴ նախագահ Վլադիմիր Պուտինի պետական այցը Հայաստան: Նա այս երկրի հանդեպ շատ ջերմ զգացմունքներ է տածում: ՀՀ նախագահ Սերժ Սարգսյանն ու Վլադիմիր Պուտինը միմյանց հետ շատ լավ ու վաղեմի հարաբերություններ ունեն»,- նկատեց նա:
Կոնստանտին Զատուլինը հիշեց՝ ՀՀ երկրորդ նախագահ Ռոբերտ Քոչարյանը մի առիթով իրեն ասել է, որ Հայաստանում բոլորն իրենց նախագահ են կարծում, և իշխանությունը դժվարություններ է ունենում տեղեկատվության՝ բաց լինելու պատճառով:
«Մենք բոլորս ուզում ենք եվրոպացի լինել: Հայաստանի մի հարևանն ընդհանրապես ասում է, որ առաջին եվրոպացին է: Իրենց եվրոպացի են ուզում զգալ նաև ադրբեջանցիները: Նույն ցանկությունն ունեն ռուսները: Այսօր հայերն ու ռուսները մեկ ռազմական համակարգի մեջ են:
Ինչ վերաբերում է ղարաբաղյան սառեցված հակամարտությանը, ապա ռազմական գործողություններ չեն սկսվում ռուսական բազայի՝ Հայաստանում տեղակայված լինելու շնորհիվ: Եռակողմ հանդիպումները կազմակերպվում են հենց ՌԴ ջանքերով: Ադրբեջանն ակնհայտորեն ցանկանում է, որպեսզի միջնորդ երկրներն առաջ տանեն իրեն ձեռնտու դրույթները, սակայն դա նրան չի հաջողվում:
Ժամանակն է, որ Ադրբեջանը հնարավորինս քիչ զգացմունքայնություն ցուցաբերի հակամարտության կարգավորման հարցում: Որոշ մարդկանց պերսոնա նոն գրադա հայտարարելով՝ նա հարցին չի օգնում: Գիտեմ, որ Պուտինը լավ է հասկանում ԼՂ հարցը, իմաստուն քաղաքական գործիչ է, և գուցե շատերը չէին ցանկանա, որ նա կրկին իշխանության գար: Քննարկվում են համագործակցության մի շարք նախագծեր՝ օրինակ՝ ռուսական տիեզերանավով հայ տիեզերագնացի թռիչքի կազմակերպումը և այլն»,- նշեց նա:
