Գյուլի հայտարարությունները միջազգային հանրության աչքին փոշի սփռելու համար են, «Առաջին լրատվական»-ի հետ զրույցում նման տեսակետ հայտնեց թուրքագետ Արտակ Շաքարյանը` անդրադառնալով Աբդուլահ Գյուլի հայտարարությանը, թե հայ-թուրքական հարաբերությունների կարգավորման գործընթացը սառեցված չէ:
Թուրքագետը նշեց, որ սրանք Աբդուլլահ Գյուլի հերթական ելույթներն են, երբ նա փորձում է ցույց տալ, որ ամեն ինչ վատ չէ, դեռ ամեն ինչ շարունակվում է, գաղտնի բանակցություններ են ընթանում. սա պարզապես միջազգային հանրության աչքերին փոշի սփռելու համար է: Ըստ նրա` շատերն, ովքեր իսկապես ռացիոնալ մտածողներ են, հասկանում են, որ դրանք թուրքերի հերթական ցուցադրական ելույթներն են, թիրախը հիմնականում միջազգային հանրությունն է, որ որևէ կտրուկ քայլ երբևէ չձեռնարկի:
«Հակառակն ասելու հնարավորություն կունենայինք, եթե Թուրքիան արձանագրությունների առումով որևէ հստակ քայլ աներ, գոնե քննարկեր ԱԺ-ում, էլ չեմ ասում ընդուներ, գոնե մտցներ ավելի հստակ օրակարգ, անընդհատ հանդես չգար հայտարարություններով, որոնք ուղղված են միջամտելու Ղարաբաղյան կարգավորման գործընթացին, այլ թողներ, որ Ղարաբաղյան հարցը լուծվեր միայն Հայաստանի և Ադրբեջանի միջև»,- մեկնաբանեց Արտակ Շաքարյանը`հավելելով, որ սրանք են այն քայլերը, որոնք ցույց կտան Թուրքիայի բարի կամքը:
Հիշեցնենք, որ ԱՄՆ 10-օրյա այցի ավարտին Թուրքիայի նախագահ Աբդուլահ Գյուլը ԱՄՆ կատարած այցի ավարտին նշել է, որ հայ-թուրքական հարաբերությունների կարգավորման գործընթացը սառեցված չէ: