Եվրպայի խորհրդի Մարդու իրավունքների հանձնակատար Թոմաս Համարբերգը, Հայաստան այցի ժամանակ անդրադառնալով ընդդիմադիր գործիչների՝ բանտերում գտնվելու հանգամանքին, ասել է, որ դրանում քաղաքական աստառ է եղել, և նրանք դատապարտվել են քաղաքական նկատառումներով:
Հայաստանի մարդու իրավունքների պաշտպան Արմեն Հարությունյանը, սակայն, իր պաշտոնավարման ընթացքում քաղբանտարկյալ եզրույթը չի օգտագործել:
Իր պաշտոնավարման վերջին ասուլիսում ՀՀ ՄԻՊ Արմեն Հարությունյանը, անդրադառնալով այդ հանգամանքին, ասաց, որ Թոմաս Համարբերգը ևս այդ տերմինը չի օգտագործել.
«Նա ասել է նույնը, ինչ-որ միշտ ես եմ ասել` մարդու իրավունքների միջազգային նորմերի տեսակետից այդպիսի տերմին չկա: Քաղաքական աստառի վերաբերյալ ապացույցների հավաքումը և ապացուցումը դրված է դատարանի վրա:
Այո, կարող են լինել կասկածներ, որ մարդկանց մեղադրանքի հիմքում եղել է ոչ այնքան ապացուցողական բազա, որքան քաղաքական աստառ, բայց դա ո՞վ պետք է ապացուցի. կասկածի փարատողը դատարանն է»:
Հարությունյանը նշեց, որ ինքը՝ որպես մարդու իրավունքների պաշտպան, կողմնակից կլիներ, որպեսզի բանտերում գտնվող ընդդիմության կողմնակիցներն այսօր ազատության մեջ լինեին. «Բայց որպես իրավաբան՝ ես հասկանում եմ, որ այստեղ խնդիրներ կան, և դրանք պետք է իրավաբանորեն գրագետ լուծել, հնարավոր չէ մի հրամանով այդ մարդկանց ազատել: Ամեն մի կոնկրետ գործի դեպքում պետք է կոնկրետ մոտեցում ցուցաբերել, և ցանկալի կլինի, որպեսզի դրանք միտված լինեն նրանց ազատելու, այլ ոչ թե նրանց ավելի շատ բանտերում պահելուն»:
Արմեն Հարությունյանը նաև համաձայնեց Թոմաս Համարբերգի այն դիտարկման հետ, թե լուրջ ձախողում է այն հանգամանքը, որ 2008 թ. մարտի 1-ի 10 զոհերի մեղավորները դեռևս բացահայտված չեն. «Իմ մոտեցումն այն է, որ իրավապահ մարմինները օրենքով նախատեսված բոլոր միջոցառումներն արել են, բայց ես դժգոհ եմ, թե ինչպես են արել: Ես կասկած ունեմ համապատասխան իրավապահ մարմինների գործունեության որակի առումով, բայց չեմ կարող ասել, որ չեն ցանկացել. գուցե պրոֆեսիոնալիզմն այդքան է եղել: Բայց փաստ է, որ դա իրոք ձախողում է, անկախ նրանից, թե ինչն է պատճառը»: