Քլինթոնի այցի ժամանակ թուրքական իշխանությունները շարունակելու են իրենց մաշված տեսակետը: Այսօր «Առաջին լրատվական»-ի հետ զրույցում այս մասին ասաց թուրքագետ Ռուբեն Մելքոնյանը`անդրադառնալով Աբդուլահ Գյուլի հայտարարությանը, թե հայ-թուրքական հարաբերությունների կարգավորման գործընթացն ավարտված չէ:
Թուրքագետը նկատեց, որ թուրքական բարձրաստիճան պաշտոնյաների մեջ Աբդուլահ Գյուլը միշտ աչքի է ընկել ավելի մեղմ հայտարարություններով և ըստ երևույթին թուրքական վերնախավում նրան հենց այդ դերն է վերապահված, որ նա ավելի քիչ ծայրահեղական հայտարարություններով է հանդես գալիս:
Նրա խոսքով` Գյուլի հայտարարությունը պետք է դիտարկել Հիլարի Քլինթոնի սպասվելիք տարածաշրջանային այցի համատեքստում, քանի որ վստահաբար կարող ենք եզրակացնել, որ Քլինթոնի այցի ժամանակ անպայմանորեն քննարկվող հարցերից են լինելու հայ-թուրքական արձանագրությունները:
« Քլինթոնի դիրքորոշումը մեզ քիչ թե շատ ծանոթ է. մասնավորապես նրա հայտնի արտահայտությունը, որ «գնդակը Թուրքիայի դաշտում է»:
Նաև պետք է դիտարկենք, որ ԱՄՆ-ն հայ-թուրքական հարաբերությունների կարգավորման միջնորդ ամենաակտիվ պետություններից մեկն է և ինչ- որ տեղ նաև պատասխանատվություն է վերցնում այս ամբողջ գործընթացի համար, ուստի Քլինթոնի այս հետաքրքրվածությունը պատահական չենք կարող համարել: Գյուլի այս հայտարարությունը նպատակ ունի հիմք ստեղծել, որպեսզի Քլինթոնի այցի ժամանակ թուրքական իշխանությունները շարունակեն իրենց այն մաշված տեսակետը, թե Թուրքիան պատրաստ է Հայաստանի հետ հարաբերությունների կարգավորմանը և դրա համար նաև նշվում է, որ հարաբերությունները վերջնականապես սառեցված չեն»,- մեկնաբանեց Ռ. Մելքոնյանը` հավելելով, որ սա իր խոսքում լուրջ որևէ փաստարկ չի պարունակում, քանի որ իրականում հարաբերությունները սառած են և մտած են փակուղի:
Անդրադառնալով ստատուս քվոյին` ասաց, որ այստեղ նույնպես ակնհայտ է նույն քաղաքականության շարունակությունը, այսինքն` Թուրքիան բացահայտ և՛ ռազմական, և՛ դիվանագիտական օժանադակություն է ցուցաբերում Ադրբեջանին և հենց այդ համատեքստում է նշում, որ ստատուս քվոյի պահպանումը ձեռնտու չէ, այսինքն` Ղարաբաղի դե ֆակտո անկախությունը բնականաբար ձեռնտու չէ Ադրբեջանին, Թուրքիային և նրանց սատարող որոշ ուժերին:
«Ես կարծում եմ, որ Գյուլի արտահայտության մեջ շատ կարևոր և էական հանգամանք է, որ Գյուլը, ըստ էության, անտեսում է ժողովուրդների ինքնորոշման իրավունքը, դա ուղղակի միակողմանիորեն խոսում է ստատուս քվոյի մասին` հաշվի չառնելով, որ այս հարցում էականը ժողովրդի ինքնորոշման իրավունքն է և Ղարաբաղի ժողովուրդը կոնկրետ իրականացրել է իր այդ իրավունքը և այստեղ մենք ևս մեկ անգամ ֆիքսում ենք, որ թուրքական քաղաքականությունը վերին աստիճանի երկակի է, այսինքն` նրանք վարում են խիստ երկակի քաղաքականություն»,- ասաց Ռուբեն Մելքոնյանը:
Հիշեցնենք, որ ԱՄՆ 10-օրյա այցի ավարտին Թուրքիայի նախագահ Աբդուլահ Գյուլը ԱՄՆ կատարած այցի ավարտին նշել է, որ հայ-թուրքական հարաբերությունների կարգավորման գործընթացը սառեցված չէ:
Նա նաև նշել էր, որ ստատուս քվոն օգտակար չէ ո՛չ Թուրքիային, ո՛չ Ադրբեջանին, ո՛չ Հայաստանին: