Մարդու իրավունքների պաշտպան Արմեն Մարտիրոսյանը, իր պաշտոնավարման հինգ տարին ամփոփելով, տեղեկացրեց, որ 2006 թ. փետրվարի 20-ից մինչև 2010 թ. դեկտեմբերի 31-ը ՄԻՊ գրասենյակը ստացել է 18,346 դիմում-բողոք 28,041 անձանցից:
Նշված ժամանակաշրջանում դրական լուծում է ստացել 530 դիմում-բողոք, որի արդյունքում վերականգնվել են 8,703 անձանց խախտված իրավունքները:
Արմեն Հարությունյանը նշեց, որ վերջին մեկ տարվա ընթացքում ՄԻՊ գրասենյակի ստացած դիմում-բողոքները ցույց են տալիս, որ ամենաշատը մարդու իրավունքները խախտվել են Երևանի քաղաքապետարանում, ոստիկանությունում, դատարաններում, գյուղապետարաններում, աշխատանքի և սոցիալական ապահովության նախարարությունում:
Իսկ հինգ տարվա տվյալներով, ամենաշատը քաղաքացիները բողոքել են Երևանի քաղաքապետարանից, մարզպետարաններից, դատարաններից, արդարադատության և աշխատանքի և սոցիալական ապահովության նախարարություններից:
«Արել ենք առավելագույնը՝ ինչ կարող էինք և հուսով ենք՝ հաջորդ մարդու իրավունքների պաշտպանը կանի ավելին»,- ասաց Արմեն Հարությունյանը և հավելեց, որ այս հինգ տարիների ընթացքում իրենք արել են հնարավորը, որպեսզի օմբուդսմենի գրասենյակը հնարավորինս զերծ պահեն քաղաքականությունից:
«Մեզ քննադատում էին թե՛ ընդդիմություն և թե՛ իշխանությունը, ինչն էլ նշանակում է, որ մենք կարողացել ենք չձուլվել այս կողմերից և ոչ մեկին: Դա մեծ արդյունք է, և հաջորդ օմբուդսմենն այս իմաստով բավականին անելիք ունի»,- ասաց ՀՀ մարդու իրավունքների պաշտպանը և ընդգծեց, որ, այնուամենայնիվ, բավարարված չէ ներկայիս մակարդակով.
«Այս ինստիտուտը պետք է հստակ հասկացվի, դեռևս կասկածներ կան, և ես բավարարված չեմ, քանզի մենք չկարողացանք ամբողջովին փարատել այդ կասկածները»: