Քոչարյանը մոնստր է. այսօր լրագրողների հետ հանդիպման ժամանակ ասաց ՀԱԿ ներկայացուցիչ Գայանե Առուստամյանը՝ խոսելով հետընտրական շրջանում քաղաքական ուժերի հնարավոր վերադասավորումների և համագործակցության մասին:
Անդրադառնալով ՀԱԿ-ԲՀԿ հնարավոր համագործակցությանը՝ նա ասաց, որ ԲՀԿ-ն իր գործուն քայլերով պետք է ապացուցի, որ իսկապես Գագիկ Ծառուկյանի խոսքը գործ է, այլ ոչ թե խաղ, որը միտված է անձնական ունեցվածքը պահպանելուն։
«Ես հակված չեմ հավատալու, որ ԲՀԿ-ն, այնուամենայնիվ, ընդդիմադիր հայացքներ կրող կուսակցություն է։ ՀԱԿ-ը հայտարարել է, որ պատրաստ է համագործակցել ցանկացած ուժի հետ, ՀԱԿ-ը բաց է համագործակցության համար, մնում է՝ մյուս ուժերն ապացուցեն, որ խաղեր չեն խաղում»,- պարզաբանեց Գայանե Առուստամյանը:
Հարցին՝ ճի՞շտ է համարում ՀԱԿ-ի՝ մանդատները վերցնելը, նա պատասխանեց՝ ԱԺ-ն հավասարազոր է արտախորհրդարանական քաղաքական դաշտին, ՀԱԿ-ը պայքարում է ցանկացած հարթությունում։ Ըստ նրա՝ պետք է պայքարել տարբեր հարթություններում։
«ՀԱԿ-ն ընտրված է և լեգիտիմորեն պայքարում է ոչ լեգիտիմ մանդատների դեմ։ Իհարկե, ճիշտ էր մանդատները վերցնելը։ Ցավալի է, որ ՀԱԿ-ը ԱԺ է մտնում յոթ մանդատով, սակայն դա պետք է ուղիղ կապ ունենա արտախորհրդարանական պայքարի հետ։ ՀԱԿ-ն իր խորհրդարանական և արտախորհրդարանական ուժերը միավորելով՝ պետք է թոթափի իշխանական լուծը։
Քսան տարվա իմ լրագրողական պրակտիկայում հանդես եմ եկել հասարակության դիրքերից և այս անգամ պետք է փոխեմ իմ դիրքը՝ որպես լրագրող, որովհետև տեսանք, թե ինչ կատարվեց. հասարակությունն ընտրեց փողը, ուրեմն այս ընտրություններից հետո՝ նախագահական ընտրություններում հրաշք ակնկալել պետք չէ, հրաշք փնտրել պետք չէ: Որպեսզի նախագահական ընտրությունները չլինեն նույն սցենարով, պետք է լինի ժողովրդի կամքը, հարկավոր է հասկանալ, որ այս պայքարը պետք է ընդունի լատենտ իրավիճակ՝ մինչև հասարակության գիտակցությունը փոխվի»,- մեկնաբանեց ՀԱԿ ներկայացուցիչը:
Անդրադառնալով ՀՀ առաջին նախագահ Լևոն Տեր-Պետրոսյանի՝ մանդատը վայր դնելու որոշմանը՝ նա ասաց, որ չի համարձակվում գնահատականներ տալ: Նրա խոսքով՝ առաջին նախագահի քայլերին գնահատական տալու համար պետք է նրա չափ փորձ ու գիտելիք ունենալ։
«Կարծում եմ՝ նա պետք է շարունակի ղեկավարել արտախորհրդարանական պայքարը։ Սա շատ ավելի դժվար է. ես կարծում եմ, որ արտախորհրդարանական դիմադրությունը պետք է նա ակտիվ պահի, իսկ խորհրդարանականը՝ պարոն Բագրատյանը»,- ասաց Գայանե Առուստամյանը:
Խոսելով ընտրություններում ՀԱԿ-ԲՀԿ համագործակցության մասին՝ Գ. Առուստամյանն ասաց՝ եթե քաղաքական հարթության վրա ընդհանուր շահ կա, որը երկրի շահն է, և ինչ-ինչ փուլերում անհամաձայնությունները մի կողմ են դրվում և միմյանց հետ համագործակցում են, նորմալ է։
«Ինձ համար տարօրինակ է, որ ինչ-ինչ անհամաձայնությունների պատճառով լքում են պայքարը. դա չի խոսում քաղաքական հասունության մասին։ Ցանկացած իրավիճակում պետք է փնտրել և գտնել դաշնակիցներ: Օրինակ՝ ես հասկանում եմ այն մարդկանց, ովքեր այդ սկզբունքային տարաձայնության հետևանքով լքում են միավորումը, դա կարող է լինել մտավորականի, արտիստի ժեստ, բայց քաղաքական միավորումների դեպքում, որոնք չեն կարողանում գալ կոնսենսուսի, սխալ եմ գնահատում»,- նման տեսակետ հայտնեց բանախոսը:
Նա չբացառեց ՀՀ երկրորդ նախագահ Ռոբերտ Քոչարյանի վերադարձը քաղաքականություն՝ նրան անվանելով մոնստր: