ՀՀ Սահմանադրական դատարանը այսօր շարունակում է ՀԱԿ դաշինքի կողմից ներկայացված` Հայաստանի Հանրապետության Ազգային ժողովի համամասնական ընտրակարգով պատգամավորներ ընտրվելու մասին ՀՀ Կենտրոնական ընտրական հանձնաժողովի 2012 թվականի մայիսի 13-ի թիվ 265-ա որոշումը վիճարկող դիմումի քննությունը, որով որպես պատասխանող կողմ են ներգրավվել ԿԸՀ ներկայացուցիչներ Տիգրան Մուկուչյանը, ԿԸՀ քարտուղար Արմեն Սմբատյանը և ԿԸՀ իրավաբանական բաժնի պետը, իսկ դիմող կողմի ներկայացուցիչներն են փաստաբան Վահե Գրիգորյանը և ՀԱԿ կենտրոնական գրասենյակի ղեկավար Լևոն Զուրաբյանը:
Համամասնական ընտրակարգի արդյունքները չեղյալ հայտարարելու վերաբերյալ ՍԴ նիստն այսօր վերսկսվեց պատասխանող կողմի ելույթով: Կենտրոնական ընտրական հանձնաժողովի նախագահ Տիգրան Մուկուչյանն իր մեկուկես ժամ տևած ելույթում ներկայացրեց հակափաստարկներ, համաձայն որոնց` ՀԱԿ-ի դիմումը հիմնված է ոչ թե փաստերի, այլ եզրակացությունների վրա:
Մուկուչյանը պնդեց, որ հանրապետության 1982 ընտրատեղամասերից 73%-ում ՀԱԿ-ն ունեցել է վստահված անձինք, ԿԸՀ-ն ստացել է ընդհանուր վերահաշվարկի 12 դիմում, որից միայն 4-ն է ՀԱԿ ներկայացուցիչների կողմից եղել: ԿԸՀ նախագահի խոսքով` եթե դաշինքը համոզված էր ընտրությունների արդյունքների կեղծման մեջ, պետք է արձանագրեր դրանք և դիմեր ԿԸՀ, ինչը, սակայն, չի արվել:
Հիշեցնենք, որ նախորդ ՍԴ նիստում` դիմումի քննության հենց սկզբից, ԿԸՀ նախագահը միջնորդություն ներկայացրեց դատարանին գործի վարույթը կարճելու վերաբերյալ` հիմք ընդունելով այն հանգամանքը, որ ՀԱԿ դիմումն իրավաչափ չէ, և դիմող կողմը օրենքով սահմանված իրավասու սուբյեկտ չէ ՍԴ նման բովանդակության դիմում քննության ներկայացնելու համար:
ՍԴ-ն, սակայն, նախորդ նիստում որոշեց ԿԸՀ միջնորդությանն անդրադառնալ ավելի ուշ, իսկ առայժմ լսել կողմերին ամբողջ ծավալով: Դատարանն այս պահին շարունակում է դիմումի քննությունը: