Այն բանից հետո, երբ ԲՀԿ առաջնորդ Գագիկ Ծառուկյանը հանդես եկավ Եվրասիական միության ստեղծման հարցում Հայաստանի ակտիվ մասնակցության օգտին հայտարարություններով և չհամաձայնեց ՀՀԿ-ի հետ կոալիցիա կազմել, Սերժ Սարգսյանը ստիպված է իր աշխարհաքաղաքական մոտեցումների մեջ նոր շեշտադրումներ ներմուծել: «Առաջին լրատվական»-ի հետ զրույցում նման տեսակետ հայտնեց Քաղաքագետների միության նախագահ Հմայակ Հովհաննիսյանը:
«Մինչ այժմ Սերժ Սարգսյանը և՛ Ռուսաստանին, և՛ Արևմուտքին փորձում էր ցույց տալ, որ նրանց համար ամենահարմար ու գործունյա գործընկերը հենց ինքն է: Բայց այն պարագայում, երբ ԲՀԿ-ն կոալիցիա չմտավ, սեփական այլընտրանքայնությունը ցույց տալու համար նրա այդ շեշտադրումներն այլևս բավարար չեն: Ռուսաստանի հետ փոխհարաբերություններում Սերժ Սարգսյանը խնդիր ունի ցույց տալու, որ ինքը լիովին ունակ է բավարարելու այդ երկրի ունեցած ակնկալիքները: Խնդիր կա նաև Արևմուտքին ցույց տալու, որ նրա հետ մերձեցման քաղաքականությունը շարունակվելու է: Այսինքն՝ կոմպլեմենտար մոտեցումների ամպլիտուդն այսօր ավելի հակասական է դառնում»,- ասաց քաղաքագետը:
Հարցին՝ կարելի՞ է ենթադրել, որ հունիսի 4-ին Հայաստան կատարելիք այցի ընթացքում ԱՄՆ պետքարտուղար Հիլարի Քլինթոնը կփորձի կանխել իշխանությունների՝ հնարավոր ռուսամետ կողմնորոշումը, Հմայակ Հովհաննիսյանը նկատեց. «ԱՄՆ բարձրաստիճան պաշտոնյայի՝ հետընտրական շրջանում առաջինը Հայաստան, այնուհետև Վրաստան, իսկ վերջում Ադրբեջան այցելելը ցույց է տալիս, որ խոսքն իսկապես գնում է տարածաշրջանի աշխարհաքաղաքական կողմնորոշումների ճշգրտման մասին»:
Հիշեցնենք, որ ԱՄՆ պետքարտուղար Հիլարի Քլինթոնը Հայաստան կժամանի հունիսի 4-ին: