Այսօր` փետրվարի 1-ին, անցյալ տարվա հուլիսի 28-ին ԼՂՀ Մարտունու զորամասի մարտական դիրքերից մեկում սպանված զինծառայողների հարազատները այդ գործով քննիչից պահանջել են տալ փորձաքննության արդյունքները կամ հրաժարվել գործի քննությունից:
Հիշեցնենք, որ խոսքը մարտական դիրքում սպանված 6 զինծառայողների` նույն զորամասի սպա, ավագ լեյտենանտ Վարդգես Թադևոսյանի և ժամկետային զինծառայողներ Անդրանիկ Սարգսյանի, Ռոբերտ Հովհաննիսյանի, Կարո Այվազյանի, Գարեգին Հովսեփյանի ու Արտեմ Մանասյանի դեպքի մասին է. դիակները հրազենային մարմնական վնասվածքներով հայտնաբերելու փաստի առթիվ հարուցվել է քրեական գործ ՀՀ քրեական օրենսգրքի 104 հոդվածի 2-րդ մասի 1-ին կետի հատկանիշներով (2 կամ ավելի անձանց սպանությունը):
Ըստ ՀՀ ՊՆ տեղեկատվության և հասարակայնության հետ կապերի վարչության հաղորդագրության` կատարվել էին դեպքի վայրի և դիակների զննություն, նշանակվել են 6 դիակների դատաբժշկական փորձաքննություններ, թվով 10 դատաձգաբանական, թվով 3 դատակենսաբանական փորձաքննություններ, որպես վկաներ հարցաքննվել են մի խումբ պարտադիր ժամկետային ծառայության զինծառայողներ, սպաներ:
ՀՀ ՊՆ ռազմական ոստիկանության համապատասխան ստորաբաժանմանը հանձնարարվել էր ձեռնարկել անհրաժեշտ օպերատիվ միջոցառումներ` մասնավորապես դեպքին առնչվող բոլոր հանգամանքները պարզելու, հնարավոր բոլոր վարկածները և Կարո Այվազյանի զորակոչի օրինականությունն ստուգելու համար:
Սակայն մինչ օրս սպանվածների ծնողները չեն ստացել փորձաքննության որևէ արդյունք, ինչը լուրջ կասկածներ է հարուցում այս սպանությունը կոծկելու, ինչ-որ անձանց հովանավորության տակ առնելու առումով: