Ձմռան ընթացքում գրանցվող թունավորումների դեպքերի մի խոշոր հատվածի պատճառը ֆերմերների կողմից թունանյութերի չափի չարաշահումն էր:
Այս մասին «Առաջին լրատվականին» հայտնեց «Կանաչ արահետ» ՀԿ նախագահ Նունե Սարուխանյանը:
Բնապահպանի խոսքով, քանի որ ջերմատները փակ տարածքներ են և վնասատուների վտանգն այստեղ ավելի մեծ է¸ հետևաբար ջերմատներում այսօր մեծ չափերի թունանյութեր են օգտագործում և ամբողջ հանրապետությունում այս մասին տեղյակ են:
«Շուկայից էլ¸ որ գնում ենք բանջարեղեն¸ միրգ¸ վրայից նկատվում են թույնի հետքերը¸ և մասնագետները շատ լավ գիտեն¸ որ փոխվում է նաև համը»¸-նշեց Նունե Սարուխանյանը: Մասնագետը խնդրեց ուշադրություն դարձնել նաև շուկայում վաճառվող պոմիդորի միջի սպիտակավուն հատվածին¸ինչը նաև լինում է գազարի դեպքում.
«Դրանցում թունանյութերի բարձր քանակություն կա¸ որը գուցե այդ պահին մահ չառաջացնի¸ բայց կթունավորի օրգանիզմը և անպայման կթողնի իր բացասական ազդեցությունը»,- նշեց նա:
Պարզվում է` հայ ֆերմերները¸ ի թիվս բազմաթիվ խախտումների¸ մոռանում են նաև¸ որ թունաքիմիկատ օգտագործելուց հետո կա որոշակի սպասման ժամկետ¸ որի ընթացքում բերքը չպետք է վաճառվի: Որոշ թունանյութերի դեպքում դա կարող է կազմել 20 օր¸ որոշների դեպքում` 1 ամիս:
Սակայն անկախ առկա վտանգներից` մեր ֆերմերները սրսկում են ու անմիջապես բերքը շուկա հանում: Ու եթե դաշտերում սրանից ենթադրվող վտանգն ավելի փոքր կլիներ¸ ապա ջերմոցներում վտանգը շատ մեծ է¸ քանի որ ջերմոցների խոնավությունը պայմաններ է ստեղծում հիվանդությունների և վնասատուների զարգացման համար:
Ի դեպ¸ ՀԿ նախագահը խորհուրդ է տալիս շուկայում ոչ թե ձգտել իդեալական ապրանքային տեսքով¸ գեղեցիկ¸ փայլուն մթերքի¸ այլ հակառակը` խուսափել դրանից:
«Երբ նկատում ենք մի փոքր վնասված կամ բծավոր խնձոր, հետ ենք վերադարձնում մթերքը¸ սակայն մենք մոռանում ենք, որ վնասատունները շատ «խելացի են» և երբևէ չեն մոտենում այն մթերքին, որի մեջ թեկուզ չնչին քանակով թունանյութ է օգտագործվել»¸- նշեց Նունե Սարուխանյանը:
