ՌԱՀՀԿ փորձագետ Էդգար Վարդանյանի կարծիքով՝ ԱՄՆ պետքարտուղար Հիլարի Քլինթոնի՝ Հայաստան կատարելիք այցի ընթացքում կքննարկվեն մի շարք արարողակարգային հարցեր, այդ թվում՝ հետընտրական զարգացումների վերաբերյալ: Այս մասին նա ասաց «Առաջին լրատվական»-ի հետ զրույցում:
«Կարծում եմ՝ Քլինթոնի և հայ պաշտոնյաների հանդիպումների հիմնական թեմաներից մեկը կլինի մայիսի 6-ին կայացած խորհրդարանական ընտրությունները: ԱՄՆ պետքարտուղարը դիվանագիտորեն կնշի, որ չնայած դրանց ընթացքում որոշակի առաջընթաց է ապահովվել, սակայն ընտրական գործընթացում մի շարք լուրջ խնդիրներ կան: Նա իշխանություններին կհորդորի նախագահական ընտրությունների շեմին վերացնել այդ թերությունները՝ հասկացնելով, որ դրանից է կախված Հայաստանի հանդեպ Արևմուտքի, մասնավորապես՝ ԱՄՆ-ի բարյացակամ վերաբերմունքը: Չեմ բացառում, որ կքննարկվեն ընտրությունների արդյունքների հետ կապված իրավիճակային հարցեր: Կարծում եմ՝ ԱՄՆ-ը հետաքրքրված է առաջին ձեռքից պարզելու, թե իշխող քաղաքական ուժն ինչ մոտեցումներ ունի իշխանության տնօրինման մասով»,- ասաց փորձագետը:
Էդգար Վարդանյանի խոսքով՝ ամերիկացի բարձրաստիճան պաշտոնյայի հայաստանյան այցի ընթացքում անդրադարձ կկատարվի նաև ղարաբաղյան հիմնախնդրի կարգավորմանը: «Սա պլանային հարց է, որին հնարավոր չէ չանդրադառնալ: Միշտ պետք է ասվի, որ բանակցային գործընթացն այլընտրանք չունի, որ ԵԱՀԿ Մինսկի խումբն այն շրջանակն է, որում պետք է ընթանան բանակցությունները»,- նշեց նա:
Նշենք, որ ԱՄՆ պետքարտուղարը Երևանում կլինի հունիսի 4-ին: Այցի ընթացքում Հիլարի Քլինթոնը հանդիպումներ կունենա Սերժ Սարգսյանի, այլ պաշտոնյաների, քաղաքացիական հասարակության ղեկավարների հետ: Հայաստանը Կովկասյան առաջին երկիրն է Քլինթոնի ուղևորության ցանկում: Այնուհետև ԱՄՆ պետքարտուղարը կմեկնի Վրաստան, ապա` Ադրբեջան:
