Հայաստանում հողերի վիճակի վատացումը հանգեցրել է հողերի բերքատվության իջեցմանը, բերքի կրճատմանը, գյուղատնտեսական մթերքի որակի վատացմանը, իսկ այս ամենի արդյունքում` աղքատության մակարդակի բարձրացմանը:
Այդ իսկ պատճառով Հայաստանում արդեն հողերի դեգրադացիայի վերաբերյալ էկոլոգիական, սոցիալական ու տնտեսագիտական վերլուծություն է արվում¸ որի շնորհիվ կկազմվի հետագա գործողությունների արդյունավետ ազգային պլան:
Անապատացման դեմ պայքարում տարածաշրջանային համագործակցության անհրաժեշտությունն ընդգծվել է 2009թ.-ի ապրիլին: Կովկասի տարածաշրջանային բնապահպանական կենտրոնը կովկասյան Բնապահպանական ոչ պետական կազմակերպությունների ցանցի հետ միասին սկսեց տարածաշրջանային նոր նախաձեռնության իրականացումը` «Հողերի դեգրադացիայի մեղմացման և Հարավային Կովկասում աղքատության դեմ պայքարի համար հողային ռեսուրսների կայուն կառավարում»:
Իսկ Հայաստանի Հանրապետությունում ծրագիրն այժմ իրականացնում է գյուղատնտեսության աջակցության «Կանաչ արահետ» ՀԿ-ն:
«Մեր առաջնային խնդիրը հարավկովկասյան շրջանում` Խրամի-Դեբեթ և Ալազանի-Յորի գետերի ավազաններում հողերի ուսումնասիրումն է¸ իսկ այնուհետ հարավկովկասյան շրջանում անդրսահմանային գետերի ավազաններում հողային ռեսուրսների կայուն կառավարման համար քաղաքականության, նախագծման և օրենսդրության բարելավումը»¸- «Առաջին լրատվականի» հետ զրույցում նշեց «Կանաչ արահետ» ՀԿ նախագահ Նունե Սարուխանյանը:
Նշենք¸ որ ծրագիրն իրականացվում է Հարավային Կովկասի բոլոր շահագրգիռ կողմերի համագործակցությամբ:
