Transparency International կազմակերպությունը հրապարակել է տարեկան ուսումնասիրությունը` 2010 թվականի կոռուպցիայի ընկալման Ինդեքսը: Հայաստանը 178 երկրների շարքում 123-րդն է: Սոցիոլոգ Բագրատ Հարությունյանի խոսքերով` սա շատ խորը եւ կարեւոր խնդիր է, այս պահին էլ բնակչության դժգոհությունները շատ մեծ են, եւ դրանք հիմնականում վերաբերում են համակարգային փոփոխությունների պահաջին: Նրա խոսքերով, օրինակ, թեեւ ճանապարհային ոստիկանության հաշվառման քննական բաժանմունքների կոռուպցիան էականորեն նվազել է, այլեւս կաշառք չեն վերցնում, բայց այցելուների դժգոհությունը նվազելու փոխարեն` մեծացել է. նախկինում, կաշառք տալով, ընթացակարգը տեւում էր մեկ օր, իսկ այժմ չորս-հինգ օր է տեւում: Այցելուներից շատերը վրդովված են, որ նույն գործընթացը, որը մեր երկրում օրեր է տեւում, հարեւան Վրաստանում ավարտվում է 15-20 րոպեում: «Որոշակի վերապահումներ ունեմ Transparency International կազմակերպության մեթոդաբանության և մեկնաբանությունների նկատմամբ, բայց քանի որ համեմատվում են նույն մեթոդական հիմքի վրա արված տարբեր տարիների տվյալները, անխոս ընդունում եմ արձանագրված միտումը: TI շատ լավ որսացել է իրավիճակի փոփոխությունը»: Սոցիոլոգի խոսքերով` պետական համապատասպան պաշտոնյաները պետք է մտահոգվեն այս տեսակ ցուցանիշով եւ հասկանան, որ հակակոռուպցիոն պայքարը միայն կաշառք վերցնելու արգելքով չի ավարտվում. «Պետք է լուծել համակարգի դիսֆունկցիոնալության հարցերը, արդիականացնել այն»,- ասել է սոցիոլոգը: