ԱԺ հասարակայնության և տեղեկատվության միջոցների հետ կապերի վարչությունից «Առաջին լրատվական»-ին հայտնում են ՀՀ Ազգային ժողովի նախագահ Սամվել Նիկոյանը մայիսի 25-ին ընդունել է Ֆրանսիայի Հանրապետության խորհրդարանի վերին պալատի` Սենատի անդամներ Ֆիլիպ Մարինիին, Սոֆի Ժուասենին և Բերնար Ֆուրնիեին:
Ողջունելով հյուրերի այցն Ազգային ժողով, պարոն Նիկոյանը կարևորել է նաև Լեռնային Ղարաբաղ նրանց կատարած այցելությունը, նշելով, որ Արցախն ու նրա ժողովուրդը նվաճել են ազատ ապրելու իրենց իրավունքը և չպետք է անտեսված լինեն միջազգային հանրության կողմից: Նա վստահություն է հայտնել, որ սենատորները հնարավորություն են ունեցել համոզվելու, որ Լեռնային Ղարաբաղը ժողովրդավարական, կայացած պետություն է:
Խորհրդարանի նախագահը կարևորել է միջազգային հանրության կողմից այս իրողության ճանաչումը: «Ղարաբաղի մրցակցային առավելությունը ժողովրդավարությունն է»,-նշել է պարոն Նիկոյանը: Նա համոզմունք է հայտնել, որ սենատորները կշարունակեն հայանպաստ գործունեությունը, իրենց ներդրումը կունենան ինչպես Լեռնային Ղարաբաղի միջազգային ճանաչման, այնպես էլ հայ-ֆրանսիական բարեկամական հարաբերությունների հետագա խորացման գործում:
Նշվել է, որ Հայաստանի և Ֆրանսիայի միջև կայուն զարգացող փոխհարաբերությունների համար նշանակալի գործոն են եղել երկու ժողովուրդների միջև պատմամշակութային դարավոր կապերը և ֆրանսահայ մեծ ու ազդեցիկ համայնքի առկայությունը:
Ազգային ժողովի նախագահը շնորհակալություն է հայտնել ֆրանսիացի բոլոր այն խորհրդարանականներին, որոնք կողմ էին քվեարկել ցեղասպանության ժխտումը քրեականացնող օրինագծին: Նրա խոսքով, համամարդկային արժեքներին հետամուտ Ֆրանսիայի այդ քայլը կարևորվում է ոչ միայն Հայոց ցեղասպանության միջազգայնորեն դատապարտման գործընթացի առումով, այլև դրանով կամրապնդվեն առհասարակ մարդկության դեմ իրագործվող հանցագործությունների կանխման մեխանիզմները: Խորհրդարանի նախագահը հույս հայտնեց, որ Ֆրանսիան այս հարցում հետևողական կլինի:
Սամվել Նիկոյանն անդրադարձել է նաև միջխորհրդարանական երկկողմ համագործակցությանը, նշելով ձևավորված լավ ավանդույթների հետագա զարգացման անհրաժեշտությունը: Կարևորվել է փոխգործակցությունը միջազգային խորհրդարանական կառույցներում:
Շնորհակալություն հայտնելով ջերմ ընդունելության համար, սենատոր Ֆիլիպ Մարինիին նշել է, որ տպավորված են Լեռնային Ղարաբաղ և Հայաստան կատարած այցելություններից:
«Ղարաբաղում մենք տեսանք ժողովրդավարական արժեքների համար պայքարող մի ժողովուրդ, որը հաստատակամ է ազատ ապրելու իր իրավունքը պաշտպանելու հարցում, ինչը նրանց հաջողվում է, -ասել է Սոֆի Ժուասենը:-Այստեղ մենք տեսանք ուժեղ երիտասարդություն, որը տեր է իր պատմությանն ու մշակույթին, համամարդկային արժեքներին, թեև դրանց պաշտպանությունը նրան հեշտ չի տրվում»:
Տիկին Ժուասենը նշել է, որ ձեռնունայն չէր եկել Ղարաբաղ. այժմ աշխատանքներ է տանում Ստեփանակերտը և Էքս ան Պրովանսը քույր քաղաքներ հռչակելու համար:
Կողմերն անդրադարձել են հայ-ֆրանսիական քաղաքական, տնտեսական, մշակութային կապերին, այլ ոլորտներին առնչվող հարցերի ևս:
