Պետդեպի զեկույցն արտահայտում է Հայաստանում մարդու իրավունքների վիճակը: Այսօր «Առաջին լրատվական»-ի հետ զրույցում նման կարծիք հայտնեց Հելսինկյան ասոցիացիայի նախագահ, իրավապաշտպան Միքայել Դանիելյանը՝ գնահատելով ԱՄՆ Պետդեպի ամենամյա զեկույցը՝ 2011 թ. աշխարհում մարդու իրավունքների ոլորտում տիրող իրավիճակի վերաբերյալ:
Ըստ Մ. Դանիելյանի՝ զեկույցում բոլոր շեշտադրումները շատ տեղին և դիպուկ են: Նա նաև մեծ հպարտությամբ նշեց, որ իր ղեկավարած կազմակերպության աշխատանքը զեկույցի համար փաստ է ծառայել, քանի որ զեկույցում 7 անգամ հիշատակվում է կազմակերպության անունը:
Հիշեցնենք, որ այսօր ԱՄՆ պետքարտուղար Հիլարի Քլինթոնը ներկայացրել է ամենամյա զեկույցը՝ 2011 թ. աշխարհում մարդու իրավունքների ոլորտում տիրող իրավիճակի վերաբերյալ: Փաստաթուղթն անդրադարձել է նաև Հայաստանին: Զեկույցի հեղինակները նշում են, որ 2008 թ. Սերժ Սարգսյանը ընտրությունների արդյունքում դարձավ Հայաստանի նախագահ: Զեկույցի համաձայն՝ Հայաստանում մարդու իրավունքների հետ կապված ամենակարևոր խնդիրն առնչվում է քաղաքացիների` իշխանությունը փոխելու, խոսքի և մամուլի ազատության, ինչպես նաև դատական անկախ իշխանության իրավունքների սահմանափակմանը: