«Ամեն ինչ պետք է անենք, որպեսզի Լեռնային Ղարաբաղը հակամարտության կարգավորման գործընթացում դառնա բանակցող կողմ»,- ԵԽԽՎ պատվիրակ, ԱԺ «Ժառանգություն» խմբակցության անդամ Զարուհի Փոստանջյանի կարծիքով` սա պիտի լինի հայկական կողմի կարևորագույն խնդիրը:
Փոստանջյանը համարում է նաև, որ պետք է փոխվի հակամարտության կարգավորման ձևաչափը. այլևս Մինսկի խումբը չպետք է լինի կարգավորման միակ ու գլխավոր միջնորդը, քանի որ նրա որդեգրած Մադրիդյան սկզբունքները հակահայկական են ու հակաժողովրդական: «ԵԱՀԿ Մադիրդյան սկզբունքներով չի կարելի առաջնորդվել, քանի որ դրանց տակ Լեռնային Ղարաբաղը չի ստորագրել»,- ասում է Զարուհի Փոստանջյանը:
Հիշեցնենք, որ անցյալ շաբաթ կայացած ԵԽԽՎ ձմեռային նստաշրջանում Զարուհի Փոստանջյանը ներկայացրել է Լեռնային Ղարաբաղի մասին հայտարարություն, որը ստորագրել են ԵԽԽՎ 22 ներկայացուցիչներ:
«Հարկ եմ համարում նշել, որ Ռուսաստանի պատվիրակները չստորագրեցին Լեռնային Ղարաբաղի անախության մասին փաստաթուղթը: Կարծում եմ, սա պետք է ինչ-որ բան ասի իշխող կուսակցություններին:
Ի դեպ, Ռուսաստանի մի ներկայացուցիչ ինձ ասաց, որ կստորագրի, եթե մեզ չհաջողվի անհրաժեշտ 20 ստորագրությունները հավաքել: Այսինքն` այս հարցում թերացել են մեր ներկայացուցիչները: Մեր քաղաքական գործիչները չեն գիտակցում, որ մենք արդեն 20 տարի է` անկախ պետություն ենք: Մենք պիտի մի քիչ ինքնուրույն քաղաքականություն վարենք»,- համոզված է Փոստանջյանը:
Լեռնային Ղարաբաղի անկախության ճանաչման մասին փաստաթուղթը պարտրասելիս Զարուհի Փոստանջյանը հարցրել է նաև Հայաստանի պատվիրակության ներկայացուցիչների կարծիքը: «Նրանք ասում էին, որ այսպիսի փաստաթուղթը հաջողություն չի կարող ունենալ: Դավիթ Հարությունյանը, օրինակ, ասաց, թե սա կացնային ոճով գրված հայտարարություն է, և հազիվ թե որևէ մեկը այն ստորագրի»:
Փոստանջյանի կարծիքով, ԵԽԽՎ-ում հաջողություն ունենալու համար անհրաժեշտ է ուժեղ ներկայացուցիչներով պատվիրակություն ունենալ և լինել ժողովրդավարական երկիր: «Մենք պիտի ժողովրդավարական երկիր լինենք, քաղբանտարկյալներ չունենանք, խոսքի ազատության իրավունքը հարգենք: Այս ամենը շատ կարևոր են Լեռնային Ղարաբաղի հարցում հաջողություն ունենալու համար»,- համոզված է Փոստանջյանը:
Այժմ հայկական պատվիրակության գլխավոր խնդիրը պետք է լինի կանխել Լեռնային Ղարաբաղի հարցով ենթահանձնաժողովի ստեղծումը: «Հուսով եմ, հզոր պատվիրակություն ունենալով` մենք թույլ չենք տա, որպեսզի Չավուշօղլուն հասնի իր նպատակին, այսինքն` ստեղծվի Լեռնայի Ղարաբաղի հարցով ենթահանձնաժողով, որովհետև դրա նպատակը մեկն է` ընդունել նոր բանաձևը, որը մեր օգտին չի լինի»,- ավարտում է Զարուհի Փոստանջյանը: