Թուրքական Cihan լրատվական գործակալության փոխանցմամբ՝ ԱՄՆ-ում գտնվող Թուրքիայի նախագահ Աբդուլլահ Գյուլը շարունակում է իր հանդիպումները: Նա այցելել է Սթենֆորդի համալսարան, որտեղ ունեցած ելույթում անդրադարձել է հայ-թուրքական հարաբերությունների կարգավորմանը.
«Հայաստանի վարչապետի հրավերով ես մեկնեցի Երևան և դրանով իսկ դարձա Հայաստան այցելած Թուրքիայի Հանրապետության առաջին նախագահը: Լավ առաջնորդից երբեմն պահանջվում է ռիսկի դիմել: Հաշվի առնելով երկու երկրների հարաբերությունները՝ իմ հայաստանյան այցը ուսուցողական օրինակ հանդիսացավ:
Հաշվի առնելով այն, որ վերջին 20 տարիներին երկու երկրների միջև հաստատված չեն դիվանագիտական հարաբերություններ, որ երկու երկրները տարաձայնություններ ունեն իրենց ընդհանուր պատմության շուրջ՝ այդ երկրների առաջնորդների համար շատ ավելի մեծ նշանակություն ստացավ հրավերը: Ներքաղաքական առումով իմ հայաստանյան այցը ռիսկային էր, արտաքին քաղաքականության համար էլ այն պարունակում էր շատ մեծ ռիսկի գործոն:
Սակայն ես մեկնեցի Երևան՝ երկու ազգերի միջև հարաբերությունների կարգավորման հույսով: Ես դեռ չեմ կորցրել այդ հույսը: Մեր փոխադարձ այցերը վերածվել են հայ-թուրքական հարաբերությունների կարգավորման հույսի խորհրդանիշի: Թեև ռիսկի գործոն կար՝ ես ճիշտ եմ համարում Երևան գնալս»:
