Լիբանանում հրատարակվող «Ազդակ» թերթը վերջին ժամանակներս լույս է տեսնում նաև արաբական տարբերակով և շարունակում է ներկայացնել երկրի հայ համայնքի այսօրվա կյանքը: Այսօր՝ թերթի 85-ամյակի առթիվ հրավիրված մամուլի ասուլիսի ժամանակ, այս մասին ասաց ՀՅԴ Հայ Դատի և քաղաքական հարցերի գրասենյակի պատասխանատու Կիրո Մանոյանը՝ հիշեցնելով, որ թերթն ունի տարբեր, այդ թվում՝ մանկական էջեր:
Թերթի մշակութային բաժինն ավելի քան 30 տարի խմբագրած Մովսես Հերկելյանն իր հերթին նկատեց, որ «Ազդակ»-ը մշտապես ներկայացրել է լիբանանահայ համայնքի մշակութային կյանքը, անդրադարձել համաշխարհային կարևորության մշակութային իրադարձություններին: «Թերթը խորհրդային տարիներին հասնում էր Հայաստան»,- ասաց նա:
Ասուլիսի մյուս բանախոս՝ «Ազդակ»-ի երևանյան աշխատակից Թաթուլ Հակոբյանն էլ տեղեկացրեց, որ թերթը լույս է տեսնում 3000 օրինակով և խիստ գնահատված ու սիրված է լիբանանահայ 150 հազարանոց համայնքի կողմից.
«Սա այն քիչ թերթերից է, որը, լինելով կուսակցական, հավասարաչափ լուսաբանում է ամենատարբեր քաղաքական ուժերի գործունեությունը: Տեղեկատվական կարևոր աղբյուր է նաև «Ազդակ»-ի կայքէջը»:
