Փետրվարի 19-ին Մատենադարանին կից հրապարակում, տեղի է ունենալու «Հայոց Արծիվներ» հայրենասիրական հասարակական կազմակերպության հիմնադրման 1-ին տարեդարձին նվիրված բացօթյա միջոցառում։
Ինչպես նշեց կազմակերպության նախագահ, ՀՀ սպորտի և երիտասարդության հարցերի փոխնախարար Խաչիկ Ասրյանը, կկազմակերպվի հայրենասիրական խաղաղ երթ` դեպի Հանրապետության հրապարակ` ի նշանավորումն ՀՀ նախագահ Սերժ Սարգսյանի պաշտոնավարման 3-րդ տարեդարձի։
Արծիվները նաև հրապարակում քոչարի են պարելու։
Նախատեսված է, որ տարեդարձին մասնակցելու են հանրապետության 57 մասնաճյուղ-գրասենյակներից ժամանած կազմակերպության 10.000 ակտիվ անդամներ։
Նկատենք, որ Արծիվների տարեդարձից մեկ օր առաջ՝ փետրվարի 18-ին, նախատեսված է Հայ ազգային կոնգրեսի հանրահավաքը։
Խ. Ասրյանը կոչ է անում «քաղաքական, հասարակական ուժերին, ովքեր պատրաստվում են առաջիկա օրերին հանրահավաքներ անցկացնել Մատենադարանին կից հրապարակում, առանց երկմտելու միանան «Հայոց Արծիվներին», կանգնեն «Հայոց Արծիվների» դրոշի տակ` առաջնորդվելով «Հայոց Պետականություն, Ազգային Բանակ, Հայոց Նախագահ» կարգախոսով»:
Ավելացնենք նաև, որ վերջերս շրջանառված լուրերի համաձայն` մոտ ապագայում հայոց գլխավոր Արծիվը՝ Խաչիկ Ասրյանը նշանակվելու է Սյունիքի մարզպետ։
Հիշեցնենք նաև, որ մոտ մեկ տարի առաջ, «Հայոց արծիվների» ծննդից օրեր անց Սյունիքի մարզպետ Սուրիկ Խաչատրյանն էլ հիմնադրեց «Դավիթբեկյան ուխտեր» ՀԿ-ն։