Հայտնի է դարձել, որ դեռ նախորդ շաբաթ անվանի բռնցքամարտիկ Անդրե Բերտոյի արյան մեջ արգելված խթանիչներ հայտնաբերելու նպատակով կատարված անալիզները դրական արդյունք են տվել:
Ներկայումս բռնցքամարտիկի դատապաշտպան Հովարդ Ջեյկոբսը բժշկական հետազոտման մասին հաշվետվության և դրա վերաբերյալ այլ փաստաթղթերի հարցում է կատարել:
«Ես չեմ կարող բացատրել այդ դրական արդյունքի պատճառները: Ես և դատապաշտպանս փորձում ենք գտնել հնարավոր պատճառները: Երբևիցե չեմ օգտագործել արհեստական որևէ խթանիչ: Երբեք չեմ ստել. բոլոր հաջողություններս նվաճել եմ քրտնաջան աշխատանքի և նվիրվածության շնորհիվ»,- հայտնել է բռնցքամարտիկը:
Իսկ BALCO ընկերության նախկին նախագահՎիկտոր Կոնտեն, ով աշխատում է նաև Բերտոյի հետ, հայտնել է, որ միջադեպի հետ որևէ առնչություն չունի: Հիշեցնենք, որ 2000 թվականին Կոնտեն մեղադրվել է մարզիկներին տարբեր խթանիչներով ապահովելու մեջ:
Հունիսի 23-ին նախատեսվում էր Անդրե Բերտոյի և Վիկտոր Օրտիսի ռևանշ հանդիպումը: Այժմ այն, հավանաբար, չի կայանա: Իսկ այսօր կայանալիք մենամարտը` Ամիր Հանի և Լամոնտ Պիտերսոնի միջև, նույնպես չի կայացել: Մենամարտից 10 օր առաջ հայտնի է դարձել, որ Պիտերսոնն արգելված խթանիչներ է օգտագործել:
