Արդեն 7-րդ օրն է՝ Եգիպտոսի ողջ տարածքում տեղի են ունենում բողոքի ակցիաներ, որոնք պահանջում են Եգիպտոսի նախագահի հրաժարականը:
Ըստ նախնական տվյալների` ավելի քան 150 մարդ զոհվել է, 4,000-ը ստացել են տարբեր աստիճանի մարմնական վնասվածքներ:
Իշխանությունները գրեթե չեն վերահսկում իրավիճակը։ Նույնիսկ հայտարարված 17-ժամանոց պարետային ժամը չի ազդում եգիպտացիների վրա, քանի որ նրանք, անտեսելով դա, շարունակում են բողոքի ցույցերը Եգիպտոսի գրեթե բոլոր քաղաքներում:
Իրավիճակը չեն շտկել կադրային լուրջ փոփոխությունները, երբ 30 տարվա ընդմիջումից հետո Եգիպտոսի նախագահ Հոսնի Մուբարաքը փոխնախագահ նշանակեց Օմար Սուլեյմանին, որը համարվում է Մերձավոր Արևելքում հետախուզության լավագույն մասնագետներից:
Մուբարաքը ցրեց նաև կառավարությունը:
Սակայն այս ամենը գրեթե ազդեցություն չի ունեցել բնակչության վրա, և մարդիկ շարունակում են պահանջել Մուբարաքի հրաժարականը:
Մեր կայքում մենք կանխատեսել էինք, որ, ամեն դեպքում, միայն Մուբարաքի հրաժարականը կարող է հանդարտեցնել իրավիճակը Եգիպտոսում: Ընդ որում, նշել էինք, որ նույնիսկ Մուբարաքի հրաժարականը և Սուլեյմանին նրա փոխարեն նշանակելը չի փոխելու իրավիճակը:
Եգիպտական իշխանությունները կարծես ընտրում են ժողովրդի հետ դիմակայությունը դանդաղորեն սրելու տակտիկան, երբ քաղաքացիները կսկսեն վերադառնալ իրենց տները, իսկ փոքրաթիվ խմբերին հեշտ կլինի «ջարդել»: Համենայդեպս, այս ծրագիրը դեռ չի աշխատում:
Եվ կործանիչները Կահիրեի վրայով թռցնելն ու եգիպտացիներին դրանով վախեցնելը միայն հուսահատության նշաններ են:
Ոստիկանները միայն թալանչիներին են ձերբակալում` այլևս չհակադարձելով ցուցարարներին։ Զինվորականները, բացի գրկախառնվելուց, ցուցարարների դեմ ոչ մի այլ գործողություն չեն իրականացնում:
Որոշ կարծիքների համաձայն էլ, Մուբարաքը փորձում է հարաբերական հանդարտություն հաստատելու միջոցով իշխանությունը փոխանցել իր մերձավորներից մեկին:
Նրանք այստեղ կրկին տեսնում են ԱՄՆ-ի ձեռքը, որը չի ցանկանում կորցնել Եգիպտոսի քաղաքական իշխանության աջակցությունը, որ ուներ Մուբարաքի իշխանության ժամանակ, և փորձում է, Մուբարաքի հետ փոխհամաձայնեցնելով, իշխանության բերել ԱՄՆ-ի հանդեպ լոյալ որևէ թեկնածուի:
Որքանով են այս կանխատեսումներն իրականանալի, և որ սցենարը կաշխատի՝ ցույց կտա մոտ ապագան, քանի որ իրադարձությունները շատ արագ են զարգանում` ժամ առ ժամ: