1897թ. այս օրը Երևանում ծնվեց հայ դերասան, ԽՍՀՄ ժողովրդական արտիստ (1967), ԽՍՀՄ պետական մրցանակակիր (1952) Գուրգեն Ջանիբեկի Ջանիբեկյանը (Տեր-Խաչատրյան):
Գուրգեն Ջանիբեկյանը 1917թ. ավարտել է Երևանի ուսուցչական ռուսական սեմինարիան, 20 տարեկանից ելույթներ է ունեցել սիրողական թատերախմբերում, մասնակցել Մկրտիչ և Սյուզան Գարագաշների օպերետային, 1920-ին՝ Զարիֆյան-Աբելյան խմբերի ներկայացումներին:
1922-ից խաղացել է Ամո Խարազյանի շրջիկ թատրոնում, Ալեքսանդրապոլի Արմեն Արմենյանի թատերախմբում , Թիֆլիսի Հայ դրամայի թատրոնում: 1924 թվականից Երևանի Առաջին պետթատրոնի, այժմ՝ Սունդուկյանի անվան թատրոն դերասան էր (1965–1967թթ.՝ նաև տնօրեն): 1940–1949 թթ. եղել է Հայկական թատերական ընկերության առաջին նախագահը, 1947–1949թթ. դասավանդել է Երևանի թատերական ինստիտուտում:
Ջանիբեկյանը Գրիգոր աղայի կերպարի (Վրթանես Փափազյանի «Ժայռ») լավագույն մարմնավորողն էր խորհրդահայ բեմում. այդ դերակատարումն իր կատարելությամբ մտել է հայ թատրոնի պատմության գոհարների շարքը:
Նրա արվեստին բնորոշ էր համառ ու անկոտրում բնավորությամբ կերպարների սոցիալ-կենցաղային ճշգրիտ ու ցայտուն վերարտադրությունը, կատարման հրաշալի տեխնիկան: Կատակերգական դերերում Ջանիբեկյանը հակվել է երգիծանքի սուր, հաճախ՝ գրոտեսկային շեշտադրումների:
Ջանիբեկյանը ռադիո և հեռուստաբեմադրություններում խաղացել է շուրջ 100 դեր: Նրա անունով Երևանում կոչվել է փողոց:
Մահացել է 1978թ.: