Իսպանիայի առաջնության 21-րդ տուրի ամենանշանակալի իրադարձությունը տեղի ունեցավ Նավարի մայրաքաղաք Պամպլոնայում: Մրցաշարային աղյուսակի ետնապահներից մեկը` «Օասասունա»-ն, «Ռեյնո դե Նավարա» մարզադաշտում ընդունել էր Մադրիդի «Ռեալ»-ին:
Որքան էլ տարօրինակ է, Խոսե Անտոնիո Կամաչոյի սաներն առաջին խաղակեսում ոչնչով չզիջեցին անվանի մրցակցին, անգամ երկար ժամանակ հենց նրանք էին նախաձեռնողի դերում հանդես գալիս:
Երկրորդ խաղակեսը սկիզբը նույնպես անցավ «Օսասունա»-ի թելադրանքով: Եվ երբ արդեն թվում էր` «Ռեալ»-ը հաղթահարել է տանտերերի ճնշումը, պամպլոնացիները դարձան գոլի հեղինակ: 63-րդ րոպեին Կասիլիասի հետ մեն մենակ մնացած Խավիեր Կամունիասը բացեց խաղի հաշիվը:
Մինչ «Ռեյնո դե Նավարա»-ում հավաքված 20 հազար երկրպագուները ցնծում էին, Մոուրինյոն միանգամից եռակի փոփոխություն կատարեց, այդ թվում՝ խաղադաշտ մտցնելով թիմի նորեկ Էմանուել Ադեբայորին:
Հանդիպման մնացած 30 րոպեներն անցան մադրիդցիների` սկզբում բուռն, այնուհետև հախուռն գրոհների ներքո: Ինչևէ, Մոուրինյոյի «Ռեալ»-ն այս մրցաշրջանում կրեց իր երկրորդ պարտությունը և մրցաշարային աղյուսակում արդեն ընդամենը 6 միավորով է գերազանցում երրորդ տեղում ընթացող «Վիլյառեալ»-ին, որն, ի դեպ, հյուրընկալվելիս 0:1 հաշվով շատ կարևոր հաղթանակ տարավ «Էսպանյոլ»-ի նկատմամբ:
Ինչ վերաբերում է «Բարսելոնա»-ին, ապա Գվարդիոլայի սաների միակ մոտիվացիան մնացել է նոր ռեկորդների սահմանումը: Հերթական տուրում կատալոնացիներն առանց մեծ ջանքեր գործադրելու երեք անպատասխան գնդակ ուղարկեցին «Հերկուլես»-ի դարպասը, հենց այն նույն «Հերկուլես»-ի, որից կրել են այս մրցաշրջանի միակ պարտությունը:
Այս հաղթանակը «Բարսելոնա»-ի համար անընդմեջ 15-րդն էր, իսկ դա նշանակում է որ նրանք կրկնեցին Մադրիդի «Ռեալ»-ի 50 տարվա վաղեմության ռեկորդը և հաջորդ խաղում «Ատլետիկո»-ին հաղթելու դեպքում կսահմանեն բացարձակ ռեկորդ:
21-րդ տուրի մյուս հանդիպումներում գրանցվեցին հետևյալ արդյունքները` «Լևանտե»-«Խետաֆե»` 2:0, «Մալագա»-«Սարագոսա»` 1:2, «Մալյորկա»-«Սպորտինգ»` 0:4, «Ռեալ Սոսյեդադ»-«Ալմերիա»` 2:0, «Դեպորտիվո»-«Սևիլիա»` 3:3, «Ատլետիկո»-«Ատլետիկ»` 0:2։ «Ռասինգ»-«Վալենսիա» հանդիպումը կկայանա այսօր: